Mandati i Xhaçkës vijon të tirret! Kushtetuesja kthehet në ‘pikën 0’

Për një vendimmarrje finale nëse Olta Xhaçka do të humbë ose jo mandatin e deputetes do të duhet të presim për një kohë ende të papërcaktuar.

Gjykata Kushtetuese shpalli këtë të Mërkurë vendimin që e detyron Kuvendin të depozitojë në GJK kërkesën për shqyrtimin e papajtueshmërisë së mandatit të Xhaçkës. Vendim ky i ngjashëm me atë të një viti më parë, i injoruar nga deputetët socialistë, e që e kthen çështjen në “pikën 0”.

Gjithçka nisi me një kërkesë të opozitës drejtuar Kuvendit dy vite më parë. Deputetët demokratë kërkuan heqjen e mandatit të deputetes për Olta Xhaçkën (asokohe edhe ministre e Jashtme) për përfitime antiligjore nëpërmjet statusit të investitorit strategjik dhënë bashkëshortit të saj, Artan Gaçi.

Që nga nisja e shqyrtimit të kësaj çështje në Kuvend, në qershor 2022, mazhoranca doli në mbrojtje të Xhaçkës, duke zvarritur procesin dhe duke rrëzuar kërkesën e opozitës në Kuvend në nëntor 2022. Pasi opozita u ankua në Gjykatën Kushtetuese, kjo e fundit vendosi në janar 2023 të shfuqizojë vendimin e Kuvendit si antikushtetues dhe i kërkoi atij që të vendoste për dërgimin pranë kësaj gjykate të mocionit te 1/10 së deputetëve.

Më shumë se 1 vit më pas, me një vendimmarrje të paprecedëntë, mazhoranca në Kuvend votoi sërish kundër, duke injoruar vendimin e Gjykatës Kushtetuese.

“Gjykata kushtetuese nuk e ka as detyrë as të drejtë e as mundësi që ti thotë parlamentit sesi duhet të veprojë për një rast apo një tjetër”, e justifikoi qëndrimin kryeministri dhe drejtuesi i PS-së Edi Rama në një intervistë televizive.

Nga ana tjetër, Kryetarja e Gjykatës Kushtetuese, Holta Zaçaj ka apeluar disa herë kur është pyetur për rastin “Xhaçka” që vendimet e kësaj gjykate janë përfundimtare dhe të zbatueshme.

Pas vendimit të PS-së për të mos dërguar në parlament kërkesën për mandatin e Xhaçkës, grupi Parlamentar i Partisë Demokratike dërgoi sërish çështjen në Kushtetuese.

Në një dalje për mediat këtë të mërkurë, kryetarja e gjykatës Holta Zaçaj njoftoi vendimmarrjen që është e njashme me një vit më parë: Kuvendi e ka për detyrim të depozitojë në GJK kërkesën për shqyrtimin e papajtueshmërisë së mandatit të deputetes socialiste Olta Xhaçka.

E pyetur nga mediat se çfarë do të ndodhë nëse PS do të mbajë të njëjtin qëndrim, ajo tha se pret që vendimet e Gjykatës Kushtetuese të zbatohen.  “Asnjë organ nuk ka të drejtë të vërë në diskutim apo të mos zbatojë vendimet që merr Gjykata Kushtetuese”, u shpreh.

Mbetet për tu parë qëndrimi i mazhorancës, megjithatë fakti është që nga ping-pongu PS-Gjykata Kushtetuese, çështja e mandatit të ish-ministres po vijon të tirret teksa legjislatura aktuale e Kuvendit po shkon drejt mbarimit.