Qeveria shqiptare ka lidhur një marrëveshje me Kombet e Bashkuara, lidhur me projekt- buxhetin për vitin 2021-2022. Teksa u ndal te dy krizat që goditën vendin, zv.kryeministri Arben Ahmetaj tha se sipas tij, qeveria nuk la asnjë pas që u godit nga tërmeti apo dhe pandemia e COVID-19.
“Çdo agjenci në familjen e OKB-së ka ndihmuar qeverinë tonë. Kjo ditë duhet përdorur si ditë reflektimi në atë moto që përmenda më parë. Dhe jo pa qëllim e përmenda projekt-buxhetin 2021-2022. Duhet të rikujtoj tërmetin dhe pandeminë, pasi ne nuk jemi vend i pasur. Ne nuk lamë asnjë mbrapa pas vitit 2019 kur ra dhe tërmeti”, tha Ahmetaj.
Mes të tjerash zv.kryeministri i është përgjigjur akuzave të opozitës në lidhje me raportin e Bankës Botërore, ndërsa theksoi se populizmi injorant, kthehet në politikë trendi.
“Do i referohem raportit të fundit të BB-së; Shqipëria e ka ulur varfërinë në raport me vendet e tjera, me shpejtësi shumë më të madhe. Duke lexuar, sfidat e mëdha, për mua në një rrezik ku populizmi injorant, kthehet në politikë trendi, atë ditë njerëz, qytetarë të angazhuar si unë dhe si ju, duhet të flasë për reforma. Varfëria nuk ulet me fjalë as të ngrohta, as të mira as populiste për të varfrit. Të gjitha janë false nëse nuk zbatohen dhe mbështet në reforma intensive. S’do të rri pa përmendur reformën në drejtësi, që ka futur elektricitet në drejtësi, apo reformën në arsim”, tha ai.
Ndër të tjera, Ahmetaj u shpreh gjatë fjalës së tij se në vendin tonë janë zbatuar 3 programe që janë nënshkruar me OKB-në.
