Kreu i grupit parlamentar të PS-së, Taulant Balla, ka komentuar sot marrëveshjen e arritur dje mes maxhorancës dhe opozitës për rregulloren e brendshme për komisionin Hetimor për zgjedhjet e 25 prillit. Përmes një prononcimi për mediet ai tha se PS dhe PD do mund të arrijnë të gjejnë gjuhën e përbashkët, duke theksuar se dialogu është çelësi i saj.
Po ashtu ai theksoi se me dakordësi të plotë, javën që vjen pritet të ngrihet edhe Komisioni për Reformën Zgjedhore, duke sqaruar se ky komision do të ndjekë formulën e bashkë drejtimit nga të dy palët.
“Kuvendi i Shqipërisë është vendi i dialogut politik. Dëshiroj dhe dua të shpreh gatishmërinë e PS dhe grupit të saj parlamentar, se disponibiliteti ynë për dialog dhe gatishmëria jonë për të bashkëpunuar për çështje që lidhen jo vetëm me punën parlamentare por me reforma të duhen çuar para, është i pakursyer. Asaj që ju i referoheni, përmes grupeve parlamentare në Kuvend ka dialog. Ne kemi diskutuar në Konferencën e kryetarëve me përgjegjshmëri për të zhbllokuar çdo lloj ngërçi që krijohet përgjatë punës, qoftë në komisionin e posaçëm që ju i referoheni. Javën e ardhme do të kemi besoj miratimin për ngritjen e Komisionit të Posaçëm të Reformës Zgjedhore. Ne jo vetëm që kemi dakordësinë e plotë për ngritjen e komisionit, por do të prezantojmë dhe përbërjen e këtij komisioni nga ana e PS. Ju kujtoj se komisionet e posaçme kanë formulën e bashkëdrejtimit, një nga PS dhe një nga PD”, tha ai.
Sipas tij palët do të diskutojnë edhe propozimet konkrete të PD edhe kërkesat e mazhorancës për kohëzgjatjen e vettingut. Madje ai u shpreh se PS kërkon nga PD që të ulen sa më parë për t’u dhënë zgjidhje këtyre çështjeve.
“Besoj se PD do të jetë gati brenda ditës së martë që të diskutojmë për të ngritur sa më shpejt komisionin e Posaçëm të Reformës Zgjedhore. Ne duhet ta institucionalizojmë këtë moment të rëndësishëm për këto çështje që duhen diskutuar. PD ka ardhur me disa propozime konkrete, për të cilat Rama dhe unë e kam thënë, ne jemi 100% të hapur për të diskutuar çështjet, pa asnjë lloj pengese dhe parakushti. Por duhen ndjekur procedurat parlamentare. 39 deputetë te PS kanë propozuar një ndryshim kushtetutës që lidhet me kohëzgjatjen e afatit te institucioneve të vettingut, me qëllim që ky proces të përfundojë. Thirrja ime është për grupet parlamentare të opozitës, që t’i miratojmë këto ndryshime sa më shpejtë. Miqtë tanë ndërkombëtarë bëjnë thirrje që të miratohen këto ndryshime deri në fund të këtij sesioni parlamentar”, tha Balla.
Nga ana tjetër edhe PD është treguar e vendosur se do të çojë deri në fund propozimet e saj, për të eliminuar burokracitë dhe shkeljet që i bëhen ligjit.
