Kolektivi “Marshojmë S’Festojmë” ka vazhduar marshimin e tij tradicional për të shënuar Ditën Ndërkombëtare të Gruas në Kosovë, me moton “Marshojmë për njana-tjetrën”.
Gjatë marshimit, gratë kanë mbajtur në dorë flamurin e Palestinës, duke shprehur solidaritet për sulmet ndaj civilëve në Gaza.
Po ashtu, në objektin e Avokatit të Popullit u vendos një baner me mbishkrimin “Një e ardhme më e mirë është e mundur”.
Gratë kanë vazhduar rrugën drejt objektit të Policisë së Kosovës, ku kanë hedhur ngjyra dhe tymuese të kuqe pranë hyrjes kryesore të stacionit policor. Ndërkohë që me altroparlantë kanë përmendur emrat e grave të vrara gjatë viteve të fundit në Kosovë.
“Poshtë Policia patriarkale, Policia i ka duar të mbushura me gjakun e grave të vrara”, deklaruan protestuesit.
Më pas, marshimi vijoi drejt objektit të Këshillit Gjyqësor të Kosovës, duke përcjellë mesazhe kundër dhunës ndaj grave dhe duke kërkuar drejtësi për viktimat.
Discussion about this post