Avokati i ish-presidentit, Ilir Meta, Genci Gjokutaj, u paraqit sot në Gjykatën e Posaçme, ku tërhoqi një kopje të vendimit të masës së sigurisë. Pas njohjes zyrtarisht me vendimin, nga sot nis afati 5 ditor për depozitimin e ankimit.
Meta u arrestua më 7 tetor, teksa po kthehej nga Kosova. Pamjet e arrestimit, ku ish-presidenti tërhiqej me forcë nga mjeti me të cilin po udhëtonte, bënë xhiron e rrjetit. Veprimet e policisë u kritikuan, por vetë autoritetet thanë se ato ishin të nevojshme pasi Meta kishte refuzuar shoqërimin dhe kishte fyer efektivët.
Presidenti i Partisë së Lirisë po hetohet për korrupsion, pastrim parash dhe fshehje të pasurisë. Përveç tij po hetohet edhe bashkëshortja e tij, Monika Kryemadhi, ndaj së cilës është dhënë masa e sigurisë detyrim paraqitje.
Të dy i kanë mohuar akuzat duke i quajtur politike.
Discussion about this post