Sulejman Margjeka, Oficeri i mbikëqyrjes pranë Shërbimit për Çështjet e Brendshme dhe Ankesat është përjashtuar nga kjo strukturë dhe po ndiqet penalisht. Burime zyrtare nga SHÇBA, konfirmojnë se janë dërguar në Prokurorinë e Tiranës materialet hetimore në bazë të dispozitave ligjore të ligjit mbi dekriminalizimin.
Në formularin e dekriminalizimit, viti 2016 Margjeka nuk ka deklaruar të dhëna të sakta, duke i mohuar ato. Ndërkohë, sa i përket rekordit kriminal në fushën e trafikut të drogës në Gjermani, çështja po ndiqet nga autoritetet policore dhe të drejtësisë.
Mësohet se në ngarkim të Margjekës është mbërritja e materialeve hetimore në lidhje me veprimtarinë e oficerit të SHÇBA-së, përfshirë kohën kur ka shërbyer në këtë strukturë, por edhe në shtetin gjerman.
Deri më tani ende nuk ka një njoftim zyrtar e publik për oficerin Margjeka, i cili në shtetin gjerman dispononte gjeneralitete të tjera, por mësohet se ky i fundit hetonte policët që shkelnin ligjin, por vetë ishte nën hetim nga autoritetet gjermane për trafik drogë.
Ai u përjashtua nga shërbimi pas informacioneve të mbërritura nga policia gjermane e cila konfirmoi që e kishte nën hetim madje kishte lëshuar edhe një urdhër-ndalimi. Në lidhje me masën në të cilën ndodhet tani oficeri, përveç ndjekjes penale dhe përjashtimit nga funksioni i mbikëqyrësit në SHÇBA, nuk ka të dhëna mbi vendndodhjen e tij.
