Ish kryeministri Sali Berisha e ka nisur konferencën e ditës së sotme me zhgënjimin që përjetoi pasi mazhoranca rrëzoi ditën e djeshme rezolutën për njohjen e gjenocidit të Srebrenicës, në Bosnjë-Hercegovinë.
Nga selia blu, Berisha e ka konsideruar rrëzimin e gjenocidit si aktin më të rëndë në këto 30 vite pluralizëm pasi sipas tij ky krim është faktuar dhe nga gjykatat ndërkombëtare.
“Për çdo vend të lirë, për çdo shoqëri të civilizuar, për çdo njeri të civilizuar dënimi i gjenocidit është një detyrim madhor, moral, por edhe ligjor ndërkombëtar. Në Parlamentin e Shqipërisë dje ndodhi akti më i rëndë, më i turpshëm në historinë 30-vjeçare të këtij vendi, refuzimi për të dënuar me një rezolutë një gjenocid të konfirmuar nga dy gjykatat ndërkombëtare, ajo e Krimeve të Luftës në ish Jugosllavi dhe gjykata e Hagës. Mbi bazën e vendimi të këtyre dy gjykatave, vendet e lira në tërësi kanë kaluar në parlament rezoluta që dënojnë gjenocidin serb, si akti më barbar që nga lufta e dytë botërore. E ka bërë këtë PE, SHBA dhe parlamente të tjera të Evropës, parlamenti i Malit të ZI, ku jeton një shumicë serbësh”, tha Berisha.
Kujtojmë se ditën e djeshme mazhoranca rrëzoi kërkesën e disa deputetëve të opozitës për realizimin në seancë parlamentare të një mocioni me debat dhe finalizimin e një rezolute në lidhje me “Njohjen dhe dënimin e gjenocidit në Srebrenicë”, duke u bërë subjekt lajmi dhe në mediat ndërkombëtare.
Discussion about this post