Një akt vendim për mbrojtjen dhe përkrahjen e grupeve në nevojë është miratuar ditën e sotme, të cilën e ka konfirmuar dhe ministrja Ogerta Manastirliu, pas mbledhjes.
Në deklaratën e saj, ministrja pohon se do të bëhet mbrojtja e kategorive të rriskuara nga vështirësitë sociale dhe ekonomike. Ndër të tjera është përmendur dhe kriza e tërmetit,e për të cilën qeveria bën me dije se ka dhënë një mbështetje të madhe për të prekurit, pavarësisht se një pjesë e madhe e tyre vijojnë ende të mos kenë marrë asnjë zgjidhje.
Më tej është folur rreth mbrojtjes sociale për mbulim energjetik për personat në nevojë, në një situatë ku çmimi i energjisë elektrike në vend po shënon rritje.
Për të gjitha këto, qeveria ka miratuar një akt të rëndësishëm që lidhet me krijimin një mekanizmi që do të ndihmojë në përditësimin e të gjithë të dhënave që vijnë nga mbrojtjet sociale. “Në këtë plan që tashmë po finalizohet, kemi vendosur që të krijojmë politika të reja të shënjestruara për grupet në nevojë dhe kategoritë përfituese. Ne do të fokusojmë vëmendjen tonë jo vetëm në forcimin e skemave financiare por për çdo transparencë. Programet elektronike ofrojnë më shumë transparencë. Këto programe do të bashkëpunojnë me njëri tjetrin për të pasur sa më shumë mburojë për familjet në nevojë”, tha Manastirliu.
Në shifrat që bëhen publike, Shqipëria është ndër vendet e fundit për mbrojtjen e kësaj shtrese, ku mbështetja ndaj tyre mungon totalisht.
