Shaip Kamberi, deputeti shqiptar në Kuvendin e Serbisë, ka reaguar pas paralajmërimit të presidentit Aleksandar Vuçiç për mbylljen e kufirit për shqiptarët e Luginës së Preshevës, përkatësisht pikën kufitare Dheu i Bardhë – Konçul. Mundësia e mbylljes së pikës kufitare Dheu i Bardhë – Konçul, raportohet se erdhi si kundërmasë për vendimin që Qeveria e Kosovës ka marrë për reciprocitet për targat e veturave nga Serbia që hyjnë në Kosovë.
Përmes një postimi në Facebook, Kamberi, këtë ide e ka quajtur fashizëm të pastër serb dhe se ajo nuk do të kalojë në asnjë rrethanë.
“Ideja për mbylljen e kufirit në Konçul është fashizëm i pastër. Nëse me të vërtetë ekziston ideja për mbylljen e kufirit në Konçul, atëherë mund ta paramendoj kush edhe është autori i saj. Por, është fakt që ‘nëpërmjet parandalimit të saj’ A. Vuçiç po e paraqet vetën si paqeruajtës i Ballkanit.”
Ai gjithashtu theksoi se me këtë do të merrte fund edhe nisma për “Open Balkan”, të cilën e kanë firmosur Serbia, Maqedonia e Veriut dhe Shqipëria.
“Në thelb ato nuk do të ishin masa represive vetëm ndaj popullsisë civile, por edhe atak i drejtpërdrejtë ndaj idesë së Ballkanit të Hapur me të cilën Vuçiç po krenohet. Në fakt, kjo ide e mbylljes së kufirit në Konçul vetëm për shqiptarët, do të ishte edhe fundi i Open Balkan. Shqiptarët me siguri nuk do të duartrokisnin këtë rast. As nën kërcënimin e cilës do fuqi nuk do të pajtoheshim me idenë që të na vendosin në ndonjë rezervat.”
Kamberi konsideron se personi i cili e ka propozuar këtë ide duhet të jetë një budalla i pastër politik, pasi thekson se ndërmarrja e masave represive ndaj popullsisë civile (shqiptare) që de fakto janë shtetas të Serbisë, është një masë fashiste të cilën as një budalla sikurse ai që e paska propozuar nuk do të ketë shans për ta aplikuar.
