Partia Demokratike ka reaguar pas deklaratës së ministres Evis Kushi se shkollat do të mbyllen për tre ditë gjatë javës që vjen pasi temperatura të acarta pritet të pushtojnë vendin.
Deputetja Merita Marku, anëtare e Komisionit të Arsimit, deklaroi se ky vendim është dështim i kryeministri Rama në sektorin e arsimit ku nuk janë siguruar as kushtet minimale për ngrohje në shkolla.
Mbyllja e shkollave për shkak se në dimër bën ftohtë, është një dështim i jashtëzakonshëm i qeverisë së Edi Ramës me arsimin. Në 8 vjet, jo vetëm që nuk ka bërë asnjë hap përpara për të rritur cilësinë në arsim, por qeveria e Edi Ramës nuk ka siguruar as kushtet minimale për ngrohje në shkolla. Të njëjtën situatë e kemi denoncuar edhe vjet, edhe para dy vitesh, por siç shihet nuk ka ndryshuar asgjë. Masa e vetme për fëmijët është mbyllja e shkollave më vend të krijimit të kushteve normale për të mësuar edhe në dimër”, shprehet Marku.
Sipas PD, kryeministri shpenzon miliona euro për ngrohjen e tij dhe nga ana tjetër, nuk bëhet asnjë investim për fëmijët.
“Këto ditë dimri po faktojnë se politika e qeverisjes së Edi Ramës me shkollat është një turp kombëtar! Shikoni dhe një kontrast tjetër të tmerrshëm, që tregon sa i pandjeshëm është Edi Rama për arsimin dhe sa të dështuar e nxjerrin këto 3 ditë dimri me shkolla të mbyllura për shkak të të ftohtit. Për të siguruar një sistem modern kondicionimi me ngrohje dhe ftohje, Edi Rama ka shpenzuar rreth 1 milionë e gjysmë euro për kryeministrinë, ndërsa fëmijët tanë detyrohem nga qeveria të qëndrojnë pa mësim nga mungesa e ngrohjes në shkolla”, tha ndër të tjera deputetja.
Ditën e djeshme, ministrja Kushi njoftoi se shkolla do të mbyllen nga data 24 deri më 26 pasi temperaturat pritet të arrijnë deri në -17 gradë celsius.
Discussion about this post