Suksesi ndërtohet në një garë të përbashkët. Kështu deklaroi kreu i Partisë Republikane Fatmir Mediu pas takimit me Sekretarin e Përgjithshëm të PD, Flamur Noka në selinë e PD-së, së bashku me Vangjel Dulen dhe Agron Dukën. Sipas tij opozita duhet të shkojë te shqiptarët për të ndërtuar diçka ndryshe.
“Koalicioni duhet të brendojë vetveten dhe mesazhin, pra të jetë jo vetëm që po shkojmë thjesht te PD, por po shkojmë si opozitë te shqiptarët për të ndërtuar diçka ndryshe”.
Mediu u shpreh i pakënaqur me rezultatin që PR ka pasur në zgjedhjet e mëparshme dhe kërkon një rezultat më të mirë në 11 maj. Sipas tij qëllimi i kësaj force politike është kontributi i përbashkët i opozitës dhe jo një rezultat në formë dhurate.
“PR është e pakënaqur me rezultatin që ka pasur, kërkon një rezultat më të mirë, por ky rezultat nuk duhet jetë në formë dhurate, por të jetë të një raport konkret i përfitimi të përbashkët. Qëllimi edhe i PR-së, Agrares dhe PD-së është të ndërtojmë një sukses të përbashkët dhe ky sukses ka vlerësimin e situatës dhe mundësisë së përfshirjes në garë në një kontribut të gjithë në atë që do të jetë fitorja e shqiptarëve dhe e opozitës”.
I pyetur se ku merr më shumë vota Partia Republikane, Mediu u përgjigj: “Unë kam marrë mandatin në Tiranë, kam kandiduar në Tiranë, megjithatë duhet të shqyrtojmë çdo lloj opsioni. Nuk është vetëm fakti personal, por për të kontribuar si përfaqësues të opozitës në të gjithë territorin, dhe duhen gërshetuar veprimtaritë që jo vetëm të shohim ku është mandati ynë, por të shohim sesi vota e PR në nivel kombëtar të jetë votë koalicioni”.
Discussion about this post