Planet për një zonë të posaçme ekonomike në Cala Finanza, në verilindje të Sardenjës, janë anuluar pasi projekti i një resorti “glamping” në Tavolara rrezikonte të shndërrohej në një skandal kombëtar “si ai i Shqipërisë”.
Ka shumë ngjashmëri mes resortit që dhëndri i Donald Trump synon të ndërtojë në lagunën pranë Vlorës dhe projektit Tavolara Bay në Cala Finanza. Por, në këtë rast, qeveria italiane ndërhyri dhe tërhoqi autorizimet, duke mbështetur kërkesat e qytetarëve dhe organizatave që kundërshtonin projektin, shkruan Euronews.
Që nga sot, projekti për ndërtimin e një kompleksi luksoz turistik në territorin e bashkisë Loiri Porto San Paolo, përballë ishullit të Tavolarës dhe rreth 20 kilometra në jug të Porto Rotondos, i zhvilluar nga kompania Tavolara Bay, nuk gëzon më autorizimet e qeverisë italiane.
Departamenti për Jugun pranë Palazzo Chigi ka urdhëruar shfuqizimin e autorizimit të dhënë më 6 shkurt 2026, i cili i kishte hapur rrugën realizimit të projektit.
Lajmi u bë publik nga vetë kryetari i bashkisë Loiri Porto San Paolo, Francesco Lai, i cili ishte gjithashtu në qendër të protestave të banorëve të Sardenjës që organizuan tubime dhe demonstrata kundër zhvillimit të projektit.
Kush protestoi kundër projektit Tavolara Bay?
Vendimi konsiderohet një fitore e rëndësishme për banorët, grupet qytetare dhe organizatat mjedisore, të cilat bashkërenduan veprimet dhe zhvilluan një fushatë të fortë kundërshtuese.
Përveç WWF, Legambiente dhe Italia Nostra, në protestë u përfshinë edhe organizata si Gruppo di Intervento Giuridico, Liberu, Rosso Mori, Comitato Costituzione Attiva Sassari, Surra, Movimento Ambiente Sardegna, Bardianía de sa Nurra, Gruttes dhe Nurnet.
Zona ku planifikohej investimi është pjesë e një zone detare të mbrojtur, ku sipas ligjit kombëtar italian ndalohet çdo ndërtim. Ajo mbrohet gjithashtu nga Plani Rajonal i Peizazhit, i miratuar në vitin 2006 nga ish-presidenti i Rajonit të Sardenjës, Renato Soru, i cili vendosi ndalimin e hapjes së kantierëve të ndërtimit brenda një distance prej 300 metrash nga vija bregdetare.
Pse u kërkua një Zonë e Posaçme Ekonomike (ZES)?
Për të shmangur këto kufizime, kompania braziliane e zhvillimit të pasurive të paluajtshme JHSF, një nga më të mëdhatë në Amerikën Latine, i kishte kërkuar qeverisë italiane që projekti të trajtohej sipas procedurave të thjeshtuara të Zonave të Posaçme Ekonomike (ZES). Fillimisht kjo kërkesë ishte miratuar.
Megjithatë, presidentja e Rajonit të Sardenjës, Alessandra Todde, e ankimoi vendimin në Gjykatën Administrative Rajonale (TAR). Seanca është caktuar për 8 korrik, ndërsa Todde ka deklaruar se është e gatshme ta çojë çështjen deri në Gjykatën Kushtetuese, nëse do të jetë e nevojshme.
Autorizimi i dhënë nga qeveria kishte të bënte vetëm me një brez toke buzë detit, ku kompania braziliane planifikonte të ndërtonte një kompleks “glamping” (resort luksoz), përmes restaurimit të një vile ekzistuese dhe vendosjes së rreth 20 kabinave të lëvizshme, pa shtuar sipërfaqen e përgjithshme të ndërtimit.
Megjithatë, përdorimi i procedurave të ZES edhe vetëm për këtë fazë të parë u konsiderua shumë problematik, pasi do të anashkalonte kufizimet kombëtare dhe rajonale për mbrojtjen e peizazhit dhe mjedisit.
Discussion about this post