Merz: Lirimi i pengjeve dhe paqja për Gazën, të arritshme

Kancelari gjerman Friedrich Merz e ka quajtur miratimin e pjesshëm të planit të SHBA-së nga Hamasi si “shansin më të mirë për paqe” për Gazën.

“Lirimi i pengjeve dhe paqja për Gazën janë të arritshme”, shkroi Merz në X.

“Pengjet duhet të lirohen. Hamasi duhet të çarmatoset. Luftimet duhet të ndalen menjëherë. E gjithë kjo duhet të ndodhë shumë shpejt”, shkroi Merz.

“Pas pothuajse dy vitesh, ky është shansi më i mirë për paqe. Gjermania do të vazhdojë të angazhohet”, shtoi ai.

Organizata islamiste palestineze, Hamas tha dje në mbrëmje se ishte dakord me pjesën më të madhe të planit të presidentit të SHBA-së, Donald Trump për t’i dhënë fund luftës, përfshirë lirimin e të gjithë pengjeve, por sipas grupit disa pika kishin nevojë për negociata të mëtejshme.

Në përgjigje, Trump i kërkoi Izraelit të ndalte menjëherë bombardimin e Gazës, në mënyrë që të mund t’i nxirrnin pengjet të sigurt.

“Bazuar në Deklaratën e sapo lëshuar nga Hamasi, besoj se ata janë gati për një PAQE të qëndrueshme”, shkroi Trump.

Më 7 tetor 2023, qindra persona të armatosur nga Hamasi dhe grupet aleate sulmuan Izraelin jugor dhe vranë rreth 1 200 njerëz dhe rrëmbyen më shumë se 250 pengje në Rripin e Gazës, duke ndezur luftën aktuale.

“Më shumë se 66 000 palestinezë janë vrarë nga sulmet izraelite, në rajonin bregdetar të izoluar – që nga fillimi i gjakderdhjes”, sipas autoritetit shëndetësor të kontrolluar nga Hamasi, shifra që konsiderohen të besueshme nga OKB-ja.