Mjeku Erion Dasho ka paralajmëruar mëngjesin e sotëm se viti i ri shkollor rrezikon të kthehet online me ardhjen e dimrit. Përmes një postimi në Facebook ai shprehet se me mësimin online, mbylljen e shkollave dhe lejimin e kafeneve plotë qeveria tregon se ka dështuar në menaxhimin e pandemisë.
Sipas tij, Shqipëria duhet të bëjë si vende të tjera që vazhdojnë mësimin normalisht, të marrë masa sigurie në shkolla, përndryshe ndërprerja e mësimit do t’i japë goditjen e fundit arsimit në vend.
“Fatkeqësisht, viti shkollor 2021-22 duket se do të jetë i treti vit “anormal” për fëmijët dhe të rinjtë në gjithë botën. Kjo është një tragjedi e vërtetë nga pikëpamja e edukimit dhe zhvillimit psikosocial. Pasojat e plota të çrregullimit të sistemit arsimor për qindra milionë fëmijë në gjithë botën janë të vështira për t’u parashikuar, por dëmi sigurisht do të jetë kolosal.
Ajo që bota po bën për të parandaluar COVID-in në shkolla është vendosja e balancës midis sigurisë dhe normalitetit. E vështirë për t’u arritur, por jo e pamundur”, shkruan ai.
Ndër të tjera ai shprehte se, që prej fillimit qeveria shqiptare ka dështuar në menaxhimin e pandemisë, duke futur në krizë vendin dhe vrare me qindra shqiptar. Sipas tij, vërtetë virusi ndikoi negativisht në të gjitha vendete e prekura, por ata që e menaxhuan mirë e morën veten që në fund të vitit të shkuar dhe këtë vit kanë vazhduar t’i bëjnë ballë me suksese, ndërsa ne vazhdojmë të degradohemi.
“Përgjigja shqiptare ndaj COVID-it nuk ka dështuar sot! Ajo ka lindur e dështuar, pasi u dominua nga politika dhe “ekspertët” e paaftë dhe puthadorë.
Shqiptarët u lanë në mëshirën e virusit dhe, fatkeqësisht, virusi u tregua i pamëshirshëm duke vrarë të paktën 15 mijë shqiptarë.
Të krijosh një “ishull të sigurt” në shkollë është masë e vlefshme nëse vendoset në një kontekst të përgjithshëm parandalimi, por e vetmuar impakti i saj është minimal.
Përvoja e vendeve që po e menaxhojnë me sukses pandeminë flet për nevojën e masave gjithëpërfshirëse që nuk lënë të çara për penetrimin e virusit”, u shpreh ai.
Sipas mjekut qeveria duhet të bind qytetarët dhe jo t’i detyrojë ata për vaksinimin.
