Kompania “Alb-Building” është pjesë e asaj liste të shoqërive të ndërtimit që marrin “pjesën e luanit” në tenderat e fuqishëm shtetërorë.
Në 10 vitet e fundit, shoqëria në pronësi të Pëllumb Beta dhe Odhise Bresha përllogaritet si fitues në një mori procedurash të prokurimit publik, të cilat në total e kalojnë vlerën e 100 milionë eurove.
E, megjithatë, pavarësisht “ecurisë së artë” të biznesit, një histori gjobe për shkelje të ligjit “Për parandalimin e pastrimit të parave dhe financimit të terrorizmit” nuk po i shmanget prej më shumë se një dekade.
Nuk është një gjobë e madhe për një kompani miliardere-shuma është 1 milionë lekë të reja. Edhe shkelja ligjore nuk është shumë e rëndë-kompania nuk ka marrë masat e nevojshme administrative për të ngritur një strukturë me qëllim parandalimin e pastrimit të parave.
Por, gjithësesi, fakti që tashmë, me vendim të konfirmuar në tre shkallët e gjyqësorit, rezulton se “Alb-Building” është e sanksionuar për shkelje të ligjit “Për Parandalimin e Pastrimit të Parave dhe Financimit të Terrorizimit” është një dekoratë, të cilën, pronarët e saj nuk do të donin ta kishin në gjoksin e kompanisë së tyre.
Historia e një gjobe 10-vjeçare
Në dhjetor të vitit 2011, Drejtoria për Parandalimin e Pastrimit të Parave njofton shoqërinë “Alb Building” se ka vendosur ndaj saj një gjobë në vlerë 1 milionë lekë të reja.
Shkaqet e dënimit, sipas vendimit të gjobës ishin:
– Shoqëria e ndërtimit “ALB-Building” sh.p.k nuk ka emëruar një person përgjegjës dhe zv/përgjëgjes;
– Nuk disponojnë një sistem të centralizuar përgjegjës per grumbullimin dhe analizimin e të dhënave.
– Nuk kanë kryer trajnime për punonjesit e shoqërisë në zbatim të gërmes “b”,te pikës 1 të nenit 11 të Ligjit nr.9917 date 19.05.2008 “Për parandalimin e pastrimit të parave dhe financimit të terrorizmit”.
Shoqëria private nuk ishte dakord me penalitetin administrativ dhe kërkoi shfuqizimin e saj në Gjykatën e Tiranës. Kjo e fundit, në qershor të vitit 2012, rrëzoi kërkesën e kompanisë.
Në vendimin e saj, gjykata konstatonte se shoqëria e ndërtimit është njoftuar për një gjobë në shumën 1.000.000 leke për mosrespektim të kërkesave të parashikuara të ligjit nr. 9917, datë 19.05.2008 “Për parandalimin dhe pastrimin e parave dhe financimin e terrorizmit”.
Drejtoria e Përgjithshme e Parandalimit dhe Pastrimit të Parave i ngarkon kësaj shoqërie një detyrim financiar prej 1.000.000 lekë, pasi kjo shoqëri ka përgjegjësi direkte për mosrespektim të afateve kohore për kthimin e përgjigjes në zbatim të nenit 11 të ligjit 9917/2008.
Vonesat e konstatuara në Aktin e Inspektimit datë 12 dhjetor 2011 mbajtur nga inspektorët e Drejtorisë së Përgjithshme të Parandalimit dhe Pastrimit të Parave kanë ardhur për shkak të veprimeve në vonesë të shoqërisë paditëse.
Këto vonesa kanë ardhur si rezultat i mos marrjes së masave përkatëse nga shoqëria paditëse. Shoqëria paditëse në seancën e shqyrtimit administrativ pranë palës së paditur më datë 22.12.2011 me anë të përfaqësuesit të saj ka pranuar se janë të ndërgjegjshëm se ato nuk e kanë paraqitur në kohë Raportin e Vetëkontrollit.
Gjithashtu akti i inspektimit në të cilin janë konstatuar shkeljet përkatëse është nënshkruar rregullisht nga drejtuesit e shoqërisë paditëse. Pra, ky akt inspektimi është pranuar nga shoqëria paditëse në momentin e hartimit të tij.
Pas këtij vendimi, kompania “Alb-Building” i drejtohet me ankim Gjykatës së Apelit të Tiranës.
Kolegji administrativ i Gjykatës së Apelit, në datë 28 qershor 2013, vendosi të rrëzojë kërkesën e shoqërisë së ndërtimit.
Sipas vendimi, “Të gjitha pretendimet e ngritura në ankim nga paditësi në proces gjenden të pabazuara nga gjykata e apelit”.
Shoqëria “Alb Building” shpk nuk heq dorë dhe i drejtohet me rekurs Gjykatës së Lartë, duke renditur disa nga arsyet se përse penalizimi nuk qëndron.
Sipas drejtuesve të saj, shoqëria “ALB – Building” SHPK ka emëruar si persona përgjegjës për parandalimin e pastrimit të parave z. Odhisea Bresha, administrator i shoqërisë, dhe z. Hasim Lama, Drejtor Finance (Urdhër datë 05.05.2009).
Po ashtu, shoqëria ka miratuar Rregulloren e Brendshme “Për Parandalimin e Pastrimit të Parave dhe Financimit të Terrorizmit” dhe e ka përshtatur atë edhe me ndryshimet e mëvonshme të ligjit (shih Vendim nr. 6, datë 25.09.2011 “Për Miratimin e ndryshimit të rregullores “Për Parandalimin e Pastrimit të Parave dhe Financimit të Terrorizmit”). Ka trajnuar personelin përkatës në periudha të ndryshme të vitit 2011, duke i njohur me ndryshimet e ligjit dhe praktikat e reja që duhen ndjekur.
Në vijim, kompania i drejtohet gjykatës se, megjithëse sa sipër janë detyrime formale ligjore, pasi shoqëria, (siç rezulton edhe nga vetë konstatimet e kontrollit) për vitin 2011 ka punuar kryesisht në ndërtimin e rrugëve të ndryshme në Shqipëri, të gjitha këto janë me tender nga D.P.Rrugëve dhe Fondi Shqiptar i Zhvillimit, si dhe nënkontraktor me “JV ALB- Building Copri”, rezulton se shoqëria ka plotësuar me përpikmëri detyrimet e saj ligjore.
Kompania e konsideron “të papritur” rezultatin e kontrollit të Drejtorisë së Pastrimit të Parave.
Sipas saj, në asnjë rast, siç rezulton edhe nga aktet e kontrollit, nuk është konstatuar nga inspektorët shkelja e detyrimit për raportimin e transaksioneve, kjo për faktin se shoqëria nuk ka kryer asnjë transaksion që duhet të raportonte sipas ligjit, pasi të gjitha transaksionet i ka kryer në rruge bankare.
Gjykata e Lartë, me vendimin e datës 7 Dhjetor 2023, ka vendosur rrëzimin e kërkesës së shoqërisë “Alb Building” dhe lënien në fuqi të vendimeve të gjykatave të shkallëve më të ulta për penalizimin me gjobë të kompanisë private.
Sipas Kolegjit Administrativ të Gjykatës së Lartë, “…pjesa më e madhe e pretendimeve në rekurs që ngre çështje të vlerësimit të provave, del jashtë juridiksionit rishikues dhe ekskluzivisht ligjor të Gjykatës së Lartë. Nëpërmjet rekursit dhe gjykimit në Gjykatën e Lartë nuk mund të pretendohet të rihapet edhe një herë shqyrtimi gjyqësor i provave. Për këtë aspekt të gjykimit shqyrtimi gjyqësor është mbyllur pas shqyrtimit të çështjes në gjykatën e apelit”.
Për këto arsye, Gjykata e Lartë vendosi “Mospranimin e rekursit të palës paditëse shoqëria “ALB-Building” SHPK, kundër vendimit nr.1547, datë 28.06.2013, të Gjykatës së Apelit Tiranë”.
Discussion about this post