Prokuroria e Durrësit ka pezulluar pas 19 muajsh hetimet lidhur me vdekjen e 4 turistëve rusë në një hotel në Qerret.
Ngjarja ka ndodhur në tetor të 2021, kur 4 turistët rusë u gjetën të pajetë në mjediset e hotelit. Duket se shkak për pezullimin e hetimeve ishte mungesa e përgjigjeve nga autoritetet ruse, pas dërgimit të letërporosive nga autoritetet hetimore shqiptare lidhur me ngjarjen.
Autoritetet shqiptare kërkuan nga autoritetet ruse përgjigjet e autopsisë të kryera atje, por pas më shumë se 1 viti nuk ka pasur asnjë kthim përgjigje.
Bashkëshortët Natali Burenkova dhe Sergei Burenkov, 58 dhe 60 vjeç, vajza e tyre Ekaterina, 31 vjeçe dhe i fejuari i saj, Nikita Belousov, 37 vjeç, gjetën vdekjen brenda pak minutash në pishinën e hotelit, ndërsa u tha se ata ishin asfiksuar.
Lidhur me ngjarjen e rëndë fillimisht u ngritën disa pista hetimi, ku më kryesorja mbeti përdorimi i tepruar i klorit në pishinën ku u gjetën viktimat, por edhe mosventilimi i mjaftueshëm i ambientit, ndërsa nuk përjashtohet edhe helmimi.
Gjithashtu prokuroria hetoi edhe në pistën e vrasjes, por pa pasur një autor.
Discussion about this post