Mjeku Petrit Vargu, i cili u shkarkua nga detyra disa muaj më pare, ka lajmëruar se do të rikthehet së shpejti në detyrë. Në një postim në profilin e tij në Facebook, Vargu shkruan se pas vendimit të formës së prerë të Gjykatës së Apelit, ai do të jetë sërish në radhët e bluzave të bardha.
Madje mjeku shton se drejtoria e QSUT do ta kompensojë financiarisht, për shkarkimin e padrejtë nga puna.
Postimi i mjekut Petrit Vargu në Facebook: Të nderuar miq ! Se shpejti kthehem në punën time, në vendin ku kam studiuar e punuar (QSUT). Gjykata e Apelit dha vendimin e formës së prerë, të kthimit tim në punë dhe drejtoria e QSUT do të më kompensojë financiarisht. Është mirë, që menaxherët e rilindjes t’i paguajnë këto lekë nga xhepi i tyre. Shteti shqiptar nuk duhet të dëmtohet për arsyen e thjeshtë që rilindas të rastësishëm, vendosen në poste drejtuese. Rasti i përjashtimit tim nga puna, uroj të mos i ndodhë askujt që ka vendosur të jetojë në vendin e tij. Një gjë është e qartë që këta nuk kanë as turp dhe as kurajo që të korrigjojnë vetë gabimin. Për këta turp është të kesh turp. Krenar për fitoren e thellë, përqafoj të gjithë dashamirësit….
Mjeku Petrit Vargu është treguar mjaft kritik me qeverinë gjatë periudhës së pandemisë së Covid-19, në lidhje me menaxhimin e situatës së kornavirusit. Shumë herë, Vargu është përplasur me anëtarët e komitetit Teknik të Ekspertëve dhe ministren Ogerta Manastirliu.
