Guvernatori i Floridës, Ron DeSantis, përjetoi disa momente paniku në shtëpinë e tij pasi një lis shekullor u rrëzua për shkak të uraganit Idalia.
Sipas mediave amerikane, nga erërat e forta që kapën shpejtësi deri në 205 kilometra në orë, është shkulur nga rrënjët një lis shekullor që zbukuronte oborrin e shtëpisë së tij. Për fat të mirë askush nuk u lëndua, tha gruaja e guvernatorit DeSantis.
Ajo postoi më pas një foto në internet që tregon pemën e madhe që ishtë rrëzuar në kopshtin e shtëpisë.
Në kohën kur pema shekullore ra, familja e DeSantis, ndodhej në shtëpi, sipas “Zonjës së Parë” të Floridës “Një lis 100-vjeçar ka rënë në shtëpinë tonë teksa ishim brenda me tre fëmijët tanë. Fatmirësisht nuk ka të lënduar”, ka shkruar ajo në mesazhin e saj.
Ditën e sotme, uragani Idalia u reduktua në një stuhi tropikale, duke prekur kryesisht bregdetin juglindor të Shteteve të Bashkuara.
Deri më tani dy persona kanë humbur jetën nga uragani “Idalia”. Më shumë se 225,000 njerëz raportohen të jenë pa energji elektrike në Florida dhe 230,000 të tjerë në Xhorxhia.
Rreth 40,000 punëtorë të energjisë në Florida janë në gatishmëri për të lëvizur dhe rivendosur energjinë sapo të kalojë stuhia.
Guvernatori i Floridës, Ron DeSantis, shpalli gjendjen e jashtëzakonshme për 49 qarqe të Floridës, ndërsa 5500 anëtarë të Gardës Kombëtare u mobilizuan për të ndihmuar me evakuimet dhe ndërtimin e mbrojtjes.
Discussion about this post