Ish-kryeministri i Kosovës, Ramush Haradinaj, në një intervistë për mediat, komentoi përplasjen mes Sali Berishës dhe Lulzim Bashës, pas vendimit të këtij të fundit për ta përjashtuar ish-liderin historik demokrat nga grupi parlamentar i PD.
Sipas tij, është e vështirë të përcaktohet si kanë ndodhur zhvillimet në Shqipëri me Berishën, ndërsa shtoi se në Kosovë tregohemi shumë të kujdesshëm në marrëdhëniet me SHBA dhe sillemi me respekt në takime pune.
“Është e vështirë të përcaktohet pse kanë ardhur këto dhe si kanë ndodhur zhvillimet në Shqipëri me z. Berisha, doktorin dhe kryetarin e PD-së dikur. E kemi kurrgjë me mbajt qëndrim, por ne në Kosovë tregohemi shumë të kujdesshëm në marrëdhëniet me SHBA dhe sillemi me respekt në takime pune. Shprehim mirënjohjen tonë, qëndrimet tona, ndonjëherë ndodh edhe të mos pajtohemi, por nuk bëjmë asnjëherë diplomacy publike, luftë qëndrimesh. Për shkak se SHBA-të kanë qenë vendimtare në ndërprerjen e gjenocidit të Serbisë mbi Kosovën dhe për shkak të bombardimeve që i shkaktuan Serbisë, në mbrojtje të territorit të Kosovës” – është shprehur Haradinaj.
Ai më tej është shprehur se edhe ai ka kaluar vështirësi me kundërshtime me amerikanët, por që nuk i ka tejkaluar shkallët e moskuptimit. Ai shprehet se SHBA-të mbrojnë sigurinë, mbrojnë interesin kombëtar dhe për këtë thotë se do të duhet që të ndërpritet çdo debat apo diskutim armiqësore ose kundërshtuese pasi nuk është në dobi të askujt.
“Nuk e kam të qartë, për momentin e kam të vështirë të flas. Unë kam kaluar sfida mjaft të mëdha, kundërshtime, por nuk kemi arritur në një shkallë moskuptimi me amerikanët. Ishin amerikanët edhe në kohën e taksës që më përkrahën për ushtrinë, pra edhe kur unë i thoja jo për heqjen e taksës me Serbinë, prapë Amerika, ma shpërbleu qëndrueshmërinë me dakordësimin për ushtrinë e Kosovës, që ishte një akt domethënës. Ata mbrojnë sigurinë, mbrojnë interesin kombëtar të Kosovës. Unë do të doja që të ndërpritet ndonjë debat, diskutim ose diplomaci publike armiqësore ose kundërshtuese se nuk është në dobi të askujt” – ka thënë më tej Haradinaj.
Discussion about this post