Vendi ynë është zgjuar sot mes reshjeve të shumta të borës dhe shiut në të gjithë territorin, situatë e cila ka shkaktuar problematika në shumë akse rrugore. Madje njoftohet se në disa prej tyre kalimi është pothuajse i pamundur. Reshjet e shiut dhe dëborës kanë shkaktuar vështirësi në qarkullimin e automjeteve në disa akse dhe segmente rrugore.
Policia e Shtetit njoftoi se problematike situata paraqitet kryesisht në bypass-in e rrugës së Arbrit dhe në Qafë Murrizë, dhe si pasojë në këtë aks nuk lejohet qarkullimi deri në pastrimin e saj nga borëpastrueset.
Në Qafthanë, zonën e Librazhdit, dhe në rrugën e Kombit, aktualisht kalohet pa zinxhirë, pasi po punohet me borëpastruese për të mbajtur pastër këto akse rrugore. Në disa akse rrugore rurale, në Korçë, Shkodër, Dibër e Kukës, kalimi bëhet me zinxhirë.
Me qëllim parandalimin e aksidenteve rrugore, si dhe për t’u ardhur në ndihmë përdoruesve të rrugës, në rast nevoje, për shkak të motit të keq, Policia e Shtetit ka marrë një sërë masash emergjente, duke rritur prezencën e shërbimeve me uniformë, në të gjitha rrugët e vendit.
Discussion about this post