Temperaturat e ulëta do të jenë shoqëruese përgjatë kësaj jave dhe do të vijojnë me vlera nën 00- në zonat malore, ku situata do të mbetet disi më shqetësuese. Sipas parashikimit të përgjithshëm të Anira Gjonit, meteorologes nga Instituti i Gjeoshkencave e cila është bërë pjesë e “Rudina” në Tv Klan me anë të një lidhjeje Skype, dita e nesërme do të ketë reshje dëbore në qarkun e Kukësit. E hëna ishte dita më e ftohtë e javës, por gjatë muajit Shkurt do të ketë një rritje graduale të temperaturave dhe ngrica e acari nuk do të jenë më prezentë.
Anira Gjoni: Kjo, ashtu siç ju e thatë është cilësuar si java më e ftohtë e këtij viti nga institui jonë pasi na kanë shoqëruar temperatura nën 0 gradë Celsius që janë të pazakonta për muajin Shkurt. Kjo javë që ka filluar që në datën 6-13 ,temperaturat do jenë nën 0 kryesisht në zonat malore, ndërsa në të ulëta dhe bregdetare duke filluar nga dita e nesërme minimalet do të shënojnë mbi 0 gradë Celsius. Dita më e ftohtë ishte dita e hënë ku temperaturat regjistruan -1 në zonat bregdetare, -4 në zonat e ulëta dhe -11 në zonat malore.
Rudina Magjistari: Gjatë kësaj jave, e hëna paska qenë dita më e ftohtë, mund të themi që do të vijnë duke u ngritur pak nga pak?
Anira Gjoni: Duke filluar nga dita e enjte do të kemi një ngritje të lehtë të temperaturave me 2-3 gradë dhe gradualisht do vazhdojnë deri javën tjetër derisa të kalojnë mbi 0, flasim për minimalen. Për sa i përket ditës së nesërme, pritet të ketë reshje dëbore në verilindje të vendit, kryesisht në qarkun e Kukësit, në zonat malore deri në 800 metër lartësi. Sa i përket temperaturave për ditën e nesërme, presim që në bregdet minimalet të jenë 1 gradë, maksimalet 8 gradë, në vendet e ulëta -3 dhe ato maksimale -8 gradë dhe në vendet malore -10 deri në -4. Shqetësuese temperaturat e ulëta do të ngelen për zonat malore.
Rudina Magjistari: Sa i përket javës pasuese, java tjetër e Shkurtit si do të jetë?
Anira Gjoni: Java tjetër pritet që temperaturat të ngrihen dhe të mos kemi më ngrica dhe acar, çka do të thotë se do të jetë e zakonshme për muajin e Shkurtit.
Discussion about this post