Pavarësisht se janë momente mjaft të vështira për t’u pikasur, duhet të themi se gjyqtari Enea Jorgji dhe kolegët e tij nuk ishin në lartësinë e pritshme në këtë ndeshje. Ai gaboi në tri momente kyçe të ndeshjes Egnatia-Partizani, në dëm të të kuqve.
15’ Portieri Sherri ndal Da Silvën me topin nën kontroll. Kryesori Jorgji urdhëron vazhdimin e lojës. Pas kontaktit me kolegët e VAR-it, ai vendos për vazhdimin e lojës. Pamjet tregojnë se Sherri, pavarësisht se e ka devijuar topin, në anën tjetër ka penguar këmbën mbështetëse të Da Silvës dhe i ka humbur ekuilibrin. Në këtë rast Jorgji bashkë me arbitrat në VAR kanë gabuar.
45+1’ Malota tenton një pasim me kokë për shokët, Bitri e devijon me kokë dhe shkakton një penallti të pakuptimtë. Enea Jorgji komunikon me VAR-in për rreth 3-4 minuta, pasi ka dyshime për pozicionin e Malotës, por në fund akordon penallti. Në asnjë moment në ekran nuk shfaqet pamja me vijën e zakonshme të VAR-it. Me aq sa mund të shihet nga pamjet që janë dispozicion, mund të themi se anësori në bashkëpunim me kolegun e tij në VAR kanë gabuar, pasi Malota është më i avancuar.
45+5’ Egnatia shënon me Camajn pas një kundërsulmi të nisur në mënyrë të befasishme. Bitri bën gabim trashanik në zotërimin e topit para zonës, por para këtij momenti është shkaktuar faull nga Zejnullai në dëm të Sotës. Më pas topi shkon te Bitri dhe loja e avantazhit mund të jetë një justifikim. Gjithsesi, as ky version nuk është i rregullt, sepse Bitri e humbet topin që në prekjen e parë dhe aq më tepër avantazhi nuk lihet kur skuadra është në mbrojtje dhe rrezikon që lojtari të humbë topin dhe të pësojë gol.
Discussion about this post