Inxhinierja Dëshira Mena, përfaqësuese e Unionit të Inxhinierëve Shqiptarë, ka ngritur shqetësime serioze mbi përmbajtjen dhe mënyrën e prezantimit të draftit të ri të Kodit Penal, gjatë një interviste në rubrikën “Opinion” në News24.
Sipas Menës, komuniteti i inxhinierëve dhe shoqëria civile janë përjashtuar nga diskutimet që në fillesat e këtij drafti. Ajo theksoi se publikimi i befasishëm i një dokumenti kaq të rëndësishëm, pa një proces gjithëpërfshirës dhe kohë të mjaftueshme për konsultim, është jo vetëm i papranueshëm, por edhe i rrezikshëm.
“Drafti na erdhi si befasi. Edhe ne si grup interesi duhet të ishim përfshirë që në zanafillë të kësaj nisme. Koha për diskutim është tepër e kufizuar dhe kjo na lë jashtë çdo mundësie reale për të ndikuar në formësimin e ligjit,” deklaroi Mena.
Në veçanti, ajo denoncoi nenin 589 të draftit, që parashikon dënim me gjobë ose deri në tre vite burg për ata që “ofrojnë ndihmë në ndërtim të paligjshëm”, përfshirë inxhinierë, zbatues dhe punëtorë.
“Kjo dispozitë ndan në mënyrë të padrejtë përgjegjësitë dhe vendos individë pa tagër ligjor në pozita penale. Një inxhinier nuk ka autoritetin të verifikojë një leje ndërtimi – është një rol që i përket autoriteteve. Në këtë mënyrë, nga roja i derës te teknikët e thjeshtë, të gjithë futen në një thes e penalizohen, ndërkohë që investitori i vërtetë mund të jetë në Dubai duke pushuar,” shtoi ajo.
Mena e quajti këtë formulim një “diversion politik” që krijon iluzionin e zbatimit të ligjit, ndërkohë që ndëshkohen të pafajshmit. Ajo paralajmëroi se nëse neni mbetet në formën aktuale, rrezikon të përdoret për propagandë politike dhe për të shtuar pasigurinë në profesionet teknike.
Sipas saj, ndryshimet në Kodin Penal janë të nevojshme, por ato duhet të hartohen me kujdes dhe në konsultim me grupet e interesit, duke respektuar realitetin shqiptar dhe funksionimin e institucioneve.
“Nuk mund të rikthejmë frymën e kontrollit punëtor-fshatar të komunizmit. Ne duhet të ecim drejt një shteti ligjor, jo drejt një forme represioni të verbër,” përfundoi Mena.
Discussion about this post