Ndryshimet në Qeveri, Rama çon për dekretim te Begaj ministrat e rinj

Kryeministri Edi Rama i ka përcjellë Presidentit Bajram Begaj emrat e ministrave të rinj për dekretim.

Dy ditë pasi bëri publike ndryshimet në Qeveri, Rama ka dërguar në Presidencë emrat e ministrave, ndërsa pritet formalizimi nga Begaj, më pas votimi në Kuvend i dekreteve dhe betimi i tyre me marrjen e detyrës.

Ndryshimet në Qeveri ishin paralajmëruar prej disa javësh, ndërkohë që Kryeministri ka pritur nisjen e sesionit parlamentar për të zyrtarizuar lëvizjet.

Pa dhënë shpjegime, Rama njoftoi pasditen e së hënës largimin e ministres së Jashtme Olta Xhaçka dhe zëvendësimi i saj me Igli Hasanin, ish ambassador i Shqipërisë pranë OSBE-së në Vjenë, dhe aktualisht koordinator i kësaj organizate për Aktivitetet ekonomike dhe mjedisore.

Xhaçka ishte në krye të Ministrisë së Jashtme prej gati dy vitesh, ndërsa më parë mbante postin e ministers së Mbrojtjes. Largimi i Xhaçkës mund të konsiderohej si një suprizë, pot ë kihet parasysh fakti se javën e ardhshme ajo do të drejtonte një sesion të Këshillit të Sigurimit, kushtuar një platforme të re të përgjigjes me ndihma humanitare, ndaj krizave të ndryshme në botë. Që prej 1 shtatorit Shqipëria ka rimarrë për herë të dytë presidencën e Këshillit të Sigurimit.

Një tjetër emër që u spostua nga Kryeministri ishte ministrja e Financave Delina Ibrahimaj. Kjo e fundit do të zëvendësohet nga Ervin Mete, aktualisht drejtor i Autoritetit të Mbikëqyrjes Financiare, dhe ish zëvendësministër i Financave në periudhën 2013-2017.

Pak javë më parë mediat njoftuan se Ibrahimaj ishte shkarkuar si ministre e Financave pas një debate që kishte pasur me zv.Kryeministren Belinda Balluku, por disa orë më pas lajmi u përgënjeshtrua nga Kryeministri Rama dhe nga Ibrahimaj.

Me ndryshimet e fundit në Qeveri, Ibrahimaj do të mbajë postin e ministers së Shtetit për Sipërmarrjen, duke zëvendësuar Edona Bilalin.

Nga qeveria është larguar ministrja e Arsimit Evis Kushi, e cila do të zëvendësohet nga Ogerta Manastirliu, ministre e Shëndetësisë. Në vend të kësaj të fundit, është propozuar Albana Koçiu, aktualisht drejtoreshë e Departamentit të Administratës Publike.

Rama ka rikthyer në Qeveri Anila Denajn, e cila do të marrë drejtimin e Ministrisë së Bujqësisë, duke zëvendësuar Frida Krifca. Kjo e fundit u vu në qendër të vëmendjes në muajin korrik pasi Komisioni Europian njoftoi se kishte vendosur të ndërpresë përkohësisht rimbursimet ndaj Qeverisë shqiptare për financimet e projekteve në bujqësi të realizuara në kuadër të Programit IPARD II për mbështetjen e bujqësisë dhe zhvillimit rural.

Kryeministri gjithashtu njoftoi krijimin e një Ministrie të re, atë të Pushtetit Vendor, duke emëruar në këtë pozicion Arbjan Maznikun, ndërkohë që shkriu funksionin e ministrit të Shtetit për Standartet dhe Shërbimet, pozicion që mbahej nga Milva Ekonomi.

Ndryshimet në kabinet

Ministër i Financave dhe Ekonomisë – Emërohet Ervin Mete
Largohet Delina Ibrahimaj

Ministër Shteti për Sipërmarrjen dhe Klimën e Biznesit – Emërohet Delina Ibrahimaj
Largohet Edona Bilali

Ministre e Shëndetit dhe Mirëqenies Sociale – Emërohet Albana Koçiu
Largohet Ogerta Manastirliu

Ministër i Arsimit dhe Sporti – Emërohet Ogerta Manastirliu
Largohet Evis Kushi

Ministër për Europën dhe Punët e Jashtme – Emërohet Igli Hasani
Largohet Olta Xhaçka.

Ministër i Bujqësisë dhe Zhvillimit – Emërohet Anila Denaj
Largohet Frida Krifca

Ministër i Pushtetit Vendor (Ministri e re): Emërohet Arbjan Mazniku

Ministria e Shtetit për Standardet dhe Shërbimet (Shkrihet) – Largohet Milva Ekonomi.