Pas mbledhjes së qeverisë, ministrja e Arsimit, Evis Kushi,ka njoftuar se është vendosur që libri i abetares të jetë i pandryshueshëm për të gjitha shkollat e vendit.
Ministrja deklaroi se do hapet një garë për tekstin e unifikuar në mënyrë që ky proces të konkretizohet me nisjen e vitit të ardhshëm shkollor.
“Sot kemi vendosur që nga kjo procedurë të përjashtohet teksti i abetares për klasën e parë. Kjo do të thotë që të gjitha shkollat të kenë një tekst të unifikuar. Abetarja është libri i parë me të cilin përballet nxënësi në bankat e shkollës. Kemi dakordësuar që për abetaren të kemi një tekst të unifikuar. Do punojmë për projektin “Një gjuhë, një abetare” në mënyrë që të fillojnë procedurat për garë të hapur që vitin e ardhshëm të gjithë vogëlushët të kenë një gjuhë një abetare”, deklaroi Kushi.
Kujtojmë që ishte vete qeveria Rama që futi abetaret me alternativa në shkolla, ndërsa është po e njëjta qeveri që ka propozuar unifikimin e saj.
Discussion about this post