Një tjetër padi pritet të ngrihet ndaj kryebashkiakut të Tiranës Erion Veliaj, aktualisht pas hekurave për korrupsion dhe pastrim parash. Paralajmërimin e bëri kryetari i PD-së, Sali Berisha. Në një deklaratë nga selia blu këtë të martë, Berisha tha se ditën e nesërme, PD do të depozitojë pranë autoriteteve një padi për mashtrim ndaj Veliajt, pas deklaratave të gënjeshtra të këtij të fundit, i cili pretendoi se ishte quajtur “ndyrësirë” nga prokurori Ols Dado në seancën për rivlerësimin e masës së sigurisë.
“Famoz në mashtrimet e tij publike, Lali Vjedhësi mashtroi qytetarët e Shqipërisë dhe komunitetit ndërkombëtar, duke postuar nga qelia procesverbal të falsifikuar dhe manipuluar, me të cilin ai me çdo kusht donte të rëndonte pozicionin e prokurorit të dosjes. Duke dënuar me forcën më të madhe këtë qendrim banditesk, e informoj Erion Veliajn dhe publikun se, ai nesër do të denoncohet për mashtrim publik dhe shihen modalitetet që kësaj dosje t’i bashkohet edhe dosja e Griseldës, e cila nuk mund t’i harrohet. Me mashtrimin e djeshëm ndaj publikut, Erion Veliaj tregoi se, për t’i shpëtuar krimeve që ka kryer është i aftë të ndërmarrë çdo veprim”, theksoi Berisha, i cili shtoi se “nesër nis përpilimi i aktakuzës ndaj tij, do të paditet për mashtrim të rremë publik”.
Erion Veliaj ndërkohë, që pas arrestimit, ka ashpëruar sulmet ndaj gjyqtarit gjyqtarit që miratoi masën e arrestit në burg ndaj tij dhe veçanërisht prokurorit që e kërkoi këtë masë, Ols Dado. Sulmet e Veliajt ndaj drejtësisë kanë shqetësuar institucionet e drejtësisë, me KLP, që reagoi më herët gjatë ditës, duke i cilësuar “minim të parimeve të demokracisë”. Një ditë më parë, GJKKO përgënjeshtroi Veliajn, i cili pretendoi se Ols Dado e ka quajtur në gjykatë “ndyrësirë”.
“Në bashki po digjen prova”
Gjatë deklaratës së tij, Berisha, teksa komentoi një video të publikuar më herët në rrjetet sociale, tha se ka 3 javë që po bëhen përpjekje për zhdukjen e provave shkresore të veprimtarive kriminale dhe bëri apel që “të mos digjen më dokumente te Bashkia Tiranë”.
“Regjimi po shkërmoqet, siç edhe ligji më i pandryshuar i diktaturave. Institucionet janë angazhuar në një përpjekje të ethshme për të zhdukur provat shkresore, diokumentet e veprimtarive të tyre kriminale. Ka 3 javë që një proces i tillë, i ethshëm, po kryhet në disa dikastere. Ajo që patë sot në Bashkinë e Tiranës është vetëm maja e ajsbergut., tha Berisha.
“Ajo, ka ndodhur siç është paralajmëruar në Këshillin e Ministrave në ministritë dhe agjencitë e Lubi Ballukut, Ministrinë e Jashtme, çuditërisht domethënë, se edhe ajo ka kusure të mëdha, Ministrinë e Brendshme, një përpjekje e tmerrshme e ethshme për t’u fshehur me djegie dhe grisjes dokumentesh. Siç e patë mbrëmë, qytetarët e Tiranës shprehën një shqetësim të madh, por pati edhe të tjerë që bënë humor, u inagurua ‘inceneratori i Tiranës’. Djegia në Bashkinë e Tiranës, e dokumenteve, jo vetëm të bashkisë e bënë përgjegjëse këtë bashki për një krim shumë të rëndë, jo vetëm të bashkisë, por edhe institucione të tjera”, shtoi ai.
Kryedemokrati pati një apel edhe për punonjësit e administratës.
“Njerëz të ndershëm të mbajnë kopje të çdo veprimtarie antiligjore kriminale të zyrtarëve të lartë të tyre. Të mos implikohen, të mos bëhen bashkëautorë në një proces karakteristik për përmbysjen e sistemeve. Të mos harrojnë se, gjurma dixhitale do të gjendet edhe në hënë, kudo që të jetë dhe auditi i përgjithshëm për të gjetur se ku kanë shkuar 56 miliardë në 12 vite të Edi Ramës, të cilat nuk janë dhënë rroga dhe pensione.”
Berisha: Rama po bën grusht shteti brenda shtetit
Ai premtoi se në qeverisjen e PD, Shqipëria nuk do të ketë kurrë prokurori politike.
Duke komentuar deklaratën e Ramës i cili paralajmëroi dëgjesë publike me rektorin e Universitet Bujqësor pas arresteve të miratuara nga GJKKO me kërkesë të SPAK, tha se, Rama është i vendosur të kontrollojë çdo mandat arresti në Shqipëri.
“Këto qendrime, së pari, dëshmojnë edhe njëherë se, Edi Rama është në tmerr, është në panik. Dëshmojnë shumë qartë se, kërkon që çdo urdhërarresti para se të ekzekutohet apo të lëshohet të kalojë nga zyra e tij, të marrin lejen e tij”, tha Berisha.
“Së fundmi, përdor me një rast të pashembullt, nuk kam dëgjuar ndonjëherë, dhe kjo është vazhdimi i grushtit të shtetit. Grushti i shtetit brenda shtetit quhet atëherë kur njëra degë e pushtetit, në rastin konkret dega ekzekutive, do të marrë fuqi dhe pushtet të degës tjetër, degës gjyqësore. E nisën me rrethimin e gjykatës dhe marrjen peng për disa orë të gjykatësve. Tani vazhdojnë të bëjnë dëgjesë publike për vendimet e gjykatës. Pra, çfarë tregojnë këto? Tregojnë se, Edi Rama është i vendosur të kontrollojë çdo mandat arresti në Shqipëri”, shtoi ai.
Discussion about this post