Kryesuesi i listës së këshilltarëve bashkiakë në Tiranë, Ilir Alimehmeti, i ftuar në Çim Peka Live komentoi rezultatin zgjedhor të tre bashkive, Elbasan, Kamzë dhe Vorë, ku u votua në mënyrë elektronike.
Alimehmeti u shpreh se ky rezultat matematikisht është i pamundur teksa tregoi dhe për eksperiencën e tij me programin online që udhëzonte qytetarët se si mund të votohet, ku sipas tij kjo mënyrë votimi nuk paraqiste aspak besueshmëri.
Sipas tij, gjatë programit online të KQZ ku ushtrohej testimi i votimit elektronik, në bashkinë e Kamzës nëse klikohej emri i Arjan Hoxhës, dilte një subjekt tjetër dhe jo “Bashkë Fitojmë”.
“Matematikisht në bazë sondazhesh dhe projeksionesh në asnjë nga këto mundësi nuk del ky rezultat. Është për të ardhur keq sepse kjo do të ndikojë shumë tek besimi i qytetarëve, i votuesve ndaj komplet sistemit të votimit dhe veçanërisht atij elektronik. Unë do ju dërgoj në këtë moment një informacion se si qëndronte më parë dhe këtë për këtë e kam vënë në dijeni kandidatin Arjan Hoxha pak ditë më parë, ku KQZ kishte një program online që i njoftonte si të votosh dhe po të zgjidhnit kandidatin, do të vinit re një gabim që unë e vura re direkt, në momentin që zgjidhet kandidati dilte poshtë subjekt tjetër dhe jo subjekti Bashkë Fitojmë. Unë i bëra nje screenshot për të vënë në dijeni kandidatin në fjalë dhe besoj që ai e ka raportuar në KQZ, nuk e di si ka ecur ajo punë. Dhe në momentin që KQZ në faqen e saj zyrtare kishte ngritur një demo me një gabim të qartë në të, lë shumë për të dëshiruar për çfarë mund të jetë sistemi elektronin në fjalë dhe sa mund të jete besueshmëria për të”, tha ai.
Discussion about this post