Ish-zëvendëskryeministri i parë kryesor i Republikës së Maqedonisë së Veriut, Artan Grubi është vetë-dorëzuar pranë pikës kufitare Bllacë me Kosovën, pasi ishte shpallur në kërkim pas masës së arrestit me burg.
Sipas policisë, Grubi u paraqit në hyrje të vendit rreth orës 06:10 dhe arrestua menjëherë.
Ai është dërguar në komisariat për procedura të mëtejshme, ndërsa autoritetet nuk dhanë detaje shtesë mbi fazën aktuale të procedimit penal.
Grubi dyshohet se është i përfshirë në një hetim që lidhet me dyshime për keqpërdorim të pozitës zyrtare, korrupsion dhe shkelje të procedurave të prokurimit publik, në kuadër të rastit që ka të bëjë me funksionimin dhe kontratat e Lotaria Shtetërore e Maqedonisë së Veriut.
Sipas organeve të ndjekjes, hetimet kanë të bëjnë me vendime dhe kontrata që dyshohet se kanë shkaktuar dëme financiare të konsiderueshme në buxhetin e institucionit, që përllogariten në 500 milionë denarë apo mbi 8 milionë euro.
Gjykata paraprakisht kishte caktuar masë paraburgimi ndaj Grubit, ndërsa autoritetet e kishin shpallur në kërkim për shkak të mosparaqitjes para organeve të drejtësisë.
Discussion about this post