Hajredin Fejzulla, 58-vjeçari nga Shqipëria, është futur në listën e personave më të kërkuar në Europë, pasi është shpallur në kërkim nga autoritetet belge.
Fejzulla, i lindur në Shqipëri, akuzohet nga autoritetet e drejtësisë në Belgjikë, si i përfshirë në trafikun e drogës, ndërsa emri i tij renditet në listën e ndër më të kërkuarve në vendet e Bashkimit Europian.
Prej kësaj fundjave, përshkrimi i tij është në listën e Europol-it.
Ai akuzohet nga autoritetet belge se ka përfituar miliona euro nga trafiku i drogës në Belgjikë.
Haredin Fejzulla u dënua me 9 dhe 4 vjet burgim nga Gjykata e Shkallës së Parë të Brukselit, si dhe 5 vjet nga Gjykata e Apelit të Brukselit, për veprat penale të trafikut të lëndëve narkotike dhe përkatësisë në organizatë kriminale, pra 18 vjet në total.
Një gjyq i vitit 2021 kundër Fejzullait zbuloi se 13 nga plantacionet gjeneruan rreth katër milionë euro, para të cilat besohet se u riinvestuan nga banda.
Haredin Fejzulla ka lindur në Shqipëri, por ka jetuar në Belgjikë për shumë kohë. E gjithë familja e tij ishte e përfshirë në organizim. Me 3 vite burg u dënua edhe djali i tij 31-vjeçar, si ndihmës logjistik dhe roje i plantacioneve.
Vetë Fejzulla ndodhet në arrati që prej 22 shtatorit 2014. Nga kjo datë policia belge nuk ka pasur asnjë informacion lidhur me shqiptarin, i cili prezantohej edhe si grek, duke përdorur emrat ‘Spiros’, ‘Robotis Postolis’ ose ‘Vasileios Samaras’.
Discussion about this post