Ngjarja në Korçë, gruaja i vë flakën vetes dhe hidhet nga ballkoni

Policia ka reaguar pas ngjarjes së ndodhur më herët gjatë ditës në Korçë, ku një grua u hodh nga lartësia e banesës.

Fillimisht, u raportua se gruaja u hodh nga ballkoni në kushtet kur banesa e saj u përfshi nga flakët për shkak të shpërthimit të një bombole gazi.

Megjithatë, në një njoftim zyrtar, policia lokale shpjegon se 49-vjeçarja i ka vënë flakën vetes dhe më pas është hedhur nga ballkoni. Gruaja ka marrë lëndime trupore dhe ka pësuar djegie dhe aktualisht ndodhet në spital.

“Rreth orës 14:30, në lagjen nr.10, Korçë, shtetasja S.K., rreth 49 vjeçe, dyshohet se është lyer me lëndë djegëse, i ka vënë flakën vetes dhe më pas është hedhur nga ballkoni. Si pasojë kjo shtetase ka marrë djegie dhe dëmtime trupore dhe ndodhet për mjekim, në spital. Grupi hetimor po punon për sqarimin e plotë të rrethanave të ngjarjes”, thuhet në njoftimin e bluve.