Pas kryeministrit Edi Rama, për vrasjen e 8-vjeçarit Mateo Vasiu në Fier, ka reaguar edhe kryetarja e Kuvendit, Lindita Nikolla. Sikurse Rama, edhe Nikolla kërkoi që autori i këtij krimi barbar të marrë ndëshkimin maksimal.
Sipas saj, pas këtij krimi qëndron një histori lëshimesh dhe një zinxhir përgjegjësish, ndërsa thekson se të gjithë duhet të nxjerrim mësime nga kjo që ndodhi.
“Dje Shqipëria humbi një fëmijë, një engjëll të vogël tetëvjeçar. Krimi i tmerrshëm ndodhi në Fier. Pas këtij krimi qëndron një histori lëshimesh dhe një zinxhir përgjegjësish. Nëse ato do të ishin shmangur, Mateo sot do të ishte në shkollë, me shokët dhe shoqet e tij. Krimineli ka dhunuar edhe më parë dhe për një krim të rëndë ka marrë një dënim përkëdhelës. Të gjithë duhet të nxjerrim mësime nga kjo që ndodhi dhe autori i këtij krimi barbar duhet të marrë ndëshkimin maksimal. Shoqëria dhe komunitetet duhet gjithashtu të reflektojnë. Krimet ndodhin para syve edhe për shkak të mungesës së vëmendjes dhe reagimit tonë”, shkruan Nikolla ndër të tjera në postimin e saj.
Për ngjarjen e rëndë reagoi më herët kryeministri Edi Rama, i cili kërkoi dënim ekstrem për autorin, dhe fajësoi gjyqtarët për vendimet që marrin.
Discussion about this post