“Ulëritëse bashkëpunimi me krimin”/ Një tjetër polic arrestohet për drogë – Detajet

Shtohet lista e efektivëve të policisë të arrestuar si pjesë e krimit dhe paligjshmërisë.

Agjencia e Mbikëqyrjes Policore ka vënë në pranga një efektiv dhe tre persona të tjerë të cilët akuzohen për “Prodhim dhe shitje e narkotikëve”.

“Agjencia e Mbikëqyrjes Policore (Rajoni Fier-Berat), në kuadër të hetimit proaktiv me metoda speciale, i cili u finalizua gjatë operacionit të datës 24.05.2024 me arrestimin në flagrancë të 4 shtetasve (mes tyre një punonjës policie) dhe procedimin e 2 shtetasve të tjerë, të dyshuar për ‘Prodhim dhe shitje e narkotikëve’, ka kryer veprimet hetimore, duke bërë të mundur sigurimin e të dhënave, nga të cilat është ushtruar kontroll në një banesë të marrë me qera nga punonjësi i policisë L.G., ku u gjetën dhe u sekuestruan në cilësinë e provës materiale një sasi prej 500 gr lëndë e dyshuar narkotike Cannabis Sattiva”, thuhet në njoftimin e AMP.

Sipas hetimeve të AMP-së, punonjësi i policisë Lorenc Gropa e përdorte banesën me qëllimin për të magazinuar lëndën narkotike.

Ditën e shtunë u njoftua arrestimi i efektivit të policisë, ndërsa pas hekurave ranë 3 kushërinj të tij, Klevis Gropa, Ledjon Gropa dhe Skerdilajd Levendi, të dyshuar për kryerjen e veprës penale “Prodhim dhe shitje e narkotikëve”. Gjithashtu, janë proceduar në gjendje të lirë Bruno Festimaj, i dyshuar për “Organizim i lojërave të palejuara” dhe “Vënia në dispozicion e ambjenteve për lojëra të palejuara”, si dhe Maliq Gropa, i dyshuar për “Prodhim dhe mbajtja pa leje e armëve të gjuetisë dhe sportive”.

“Ulëritëse bashkëpunimi i policë me krimin”

Disa efektivë janë arrestuar javët e fundit nga AMP për vepra të ndryshme penale. Bujë kanë bërë prangosjet e zyrtarëve të lartë të vënë në pranga me urdhër të Prokurorisë së Posaçme. Hetimet kanë zbuluar bashkëpunimin e drejtuesve të lartë të uniformave blu me personazhe famëkeqe të botës së krimit.

Shqetësim për bashkëpunimin e policisë me krimin e ka shprehur edhe drejtuesi i SPAK-ut Altin Dumani.

“…Është ulëritëse kur bëhen pjesë dhe bashkëpunojnë me krimin (policia), në krimet që krimi i organizuar kryen. Shembujt janë publik, Bistri, disa shefa komisariatesh, shefa krimesh, nuk mund të rri pa e adresuar këtë shqetësim”, tha kreu i Prokurorisë së posaçme në prezantimin e raportit të institucionit që drejton gjatë vitit 2023.