Kartoni i kuq i dhënë ndaj lojtarit të tij Lorenzo Pellegrinit në ndeshjen kundër Udinezes e ka acaruar shumë trajnerin e Romës, Jose Mourinho, të cilit duket se nuk i ka dalë ende inati.
Përmes një postimi në rrjetet sociale tekniku portugez ka vazhduar me akuzat ndaj arbitrit Antonio Rapuano, duke shkruar: ‘Dikush vendosi të ishte protagonist’.
Roma festoi të enjten ndaj Udineses me rezultatin 1-0 në Stadio Olimpico, megjithatë festa e tyre u prish nga kartoni i kuq i Pellegrinit.
Mesfushori italian mori dy kartonë të verdhë dhe për këtë arsye do të humbasë derbin e të dielës me Lazion.
Këtë sezon, 25-vjeçari ka qenë ndër interpretuesit më të mirë të Romës me gjashtë gola dhe dy asistime në tetë ndeshje në të gjitha garat.
Mourinho u frustrua dukshëm nga vendimi i gjyqtarit dhe u bëri thirrje drejtorëve të klubit që të apelojnë kartonin e verdhë.
“Unë nuk i njoh mekanizmat ligjorë në futbollin italian, por nëse mund të apelojmë, atëherë duhet të provojmë,”- i tha ai DAZN pas lojës.
Duket e vështirë, nëse jo e pamundur, të shohësh klubin të bëjë një apel për një karton të verdhë, e lëre më ta fitojë atë.
Më tej në reagimin e tij në rrjetet sociale, Mourinho ka shkruar: “Të luash pas një disfate nuk është kurrë e lehtë dhe të fitosh përsëri është një ndjenjë e mrekullueshme, edhe nëse një djalë vendosi të jetë protagonist,”- shkroi Special One në Instagram dhe nuk është shumë e vështirë të merret me mend kujt i referohej.
Ndërsa portugezi njihet për reagimet e tij në situata të tilla, të cilat gjithmonë i bën shumë të mëdha./K.T/Gijotina.com
