Pas takimit që bëri në Presidencë me Kreun e Shtetit Bajram Begaj, kryetari i Partisë për Drejtësi, Integrim dhe Unitet Shpëtim Idrizi ka dhënë një prononcim përpara gazetarëve.
Ai foli në kuadër të konsultimeve për caktimin e datës së zgjedhjeve vendore.
Për Idrizin, më shumë sesa caktimi i datës, një rëndësi shumë më e madhe duhet t’i kushtohet standarteve të zgjedhjeve. Kreu i PDIU-së bëri të ditur se ndau me presidentin shqetësimin e tij për faktin se ndoshta “jemi vonë” për produktin e reformës Territoriale dhe asaj Zgjedhore.
“Duket se këto zgjedhje do të shoqërohen me të gjitha problematikat që kanë pasur. Ndava me presidentin që ndoshta jemi vonë për produktin e Territoriales dhe Zgjedhores. Edhe raporti i ODIHR ka adresuar një sërë problemesh me shit-blerjen e votës, me votën e emigrantëve, me votimin elektronik…”
Kurse i pyetur për takimin që mbajtën dje disa nga aleatët e PD me kryedemokratin Sali Berisha, Idrizi tha se PDIU është duke e vlerësuar situatën dhe se do të jetë në kontakt me të gjitha forcat politike.
Discussion about this post