Nuk kanë të ndalur rastet tragjike të humbjes së jetës nga Covid-19 në Kosovë, raportohet se një foshnje vetëm 3-javëshe ka ndërruar jetë si pasojë e infektimit. Rasti është konfirmuar nga drejtoresha e Neonatologjisë Dr. Hajrije Ismaili.
“Po ka qenë rast i pranuar në gjendje të rëndë i konfirmuar Covid-19 pozitiv. Ka pas pneumoni të rëndë e poashtu është konfirmuar edhe sepsë. Vazhdimisht ka qenë në ventilim mekanik si pasojë e infeksionit të rëndë mushkëror dhe sistemik, si dhe nën monitorim të vazhdueshëm nga ekipet mjekësore”, ka deklaruar Ismaili.
Sipas informacioneve thuhet se e gjithë familja e viktimës kanë qenë të infektuar me Covid-19.
Bilanci i jetëve të humbura tashmë në Kosovë është në shifra alarmante dhe nuk po kursen askënd. Vetëm në javën e fundit kanë humbur jetën 4 gra shtatzënë si pasojë e infektimit me Covid-19.
Mjekët në Kosovë kanë bërë thirrje për vaksinim të grave shtatzëna dhe lehona. Sipas gjinekologëve dhe infektologëve, vaksinat kundër Covid-19 nuk ndikon në shëndetin e grave shtatzënë dhe as në beben e tyre, gjithashtu nuk ndikon në gjidhënie.
