Mjekët e Korçës dhe Durrësit janë në protestë për shkak se prej muajit Maj nuk kanë marrë shpërblimet e premtuara për shërbimin gjatë pandemisë.
Rreth 100 mjekë, infermierë dhe sanitarë në Korçë kanë firmosur një peticion pasi thonë se nuk kanë marrë shpërblimet që ju ishin premtuar pasi kanë qenë gjatë gjithë kohës në shërbim të pacientëve Covid. Ata i janë drejtuar edhe portalit “Shqipëria që duam” por shqetësimi i tyre nuk ka gjetur zgjidhje. Përgjigjja e vetme që kanë marrë është se kanë mungesë të listës së personave që e përfitojnë, listë e cila më pas është dërguar, por që nuk ju është kthyer më përgjigje.
Sipas këtyre të fundit shqetësim mbetet fakti se këto shpërblime mund t’i marrin vetëm brenda muajit dhjetor, sepse në qoftë se kalon ky vit mund të marrin si justifikim djegien e fondit pasi kaloi viti kur ishin parashikuar të jepeshin këto shpërblime.
Ndërkohë, kryeministri nxori vendimin për shpërblimin e punonjësve të shëndetësisë që punojnë për parandalimin dhe mjekimin e Covidit.
Edhe mjekët e infermierët e Durrësit nuk kanë marrë shpërblimet që në muajin maj, ndërkohë që këta të fundit nuk marrin asnjë përgjigje.
Mjekët thonë se NjVKSHD nuk sqaron asgjë mbi situatën e mjekëve që nuk marrin pagën e tyre. Këta të fundit nuk marrin informacion zyrtar mbi situatën e pagave dhe kur do bëhen likuidimet për bluzat e bardha.
Por, në mbledhjen e qeverisë, ka qenë vetë kryeminstri Rama i cili deklaroi se për të gjithë stafin mjekësor, infermierë, sanitarë dhe shoferë ambulance, shpërblimi do jëtë nga 500 në 1000 euro. “Sot ne kemi vendosur se për të gjithë personelin mjekësor, mjek dhe infermierë, sanitarë dhe shoferë, të angazhuar në sistemin e vijës së parë, në luftën frontale me koronavirusin, do ti paguajmë 1000 euro + në muaj, deri në mbarimin e epidemisë. Pra do t’i paguajmë 1000 euro plus në muaj deri në mbarimin e epidemisë, mjekët dhe infermierët. Ndërsa sanitaret dhe shoferët me 500 euro”, tha kryeministri Rama në mbledhjen e qeverisë, e cila u mbajt pasi u shfaq Covid-19 në vendin tonë.
Nëpërmjet një postimi në ‘Twitter’, ai deklaroi se 1000 euro shpërblim ka qenë vetëm për ata persona të cilët do të jenë në vijën e parë të luftës. Më tej u kërkoi bluzave të bardha të mos turpërojnë uniformën. “Unë e kam thënë shqip që do të paguajmë 1000€ mbi pagën për mjekët e infermierët në Vijën e Zjarrit! Kush ka ngatërruar vijën e zjarrit në spitalet Covid e në autoambulanca, me detyrën e bluzës së bardhë në territor, duhet të kthjellohet e të mos turpërojë bluzën e bardhë! Kush i nxit nga jashtë kërkesat për shpërblime pa asnjë sens bën politikën e mbrapshtë që ka bërë gjithnjë dhe do ndëshkohet nga populli, kush nga brenda bëhet mashë politike cenon misionin e shenjtë e moralin e bluzave të bardha në këtë luftë dhe nuk do të justifikohet në vijim”, shkroi Rama.
Discussion about this post