Informaliteti dhe mospagimi i taksave nga bizneset në vend është shumë i madh. Edhe pse shumica janë biznese të vogla, të cilat për disa arsye nuk janë korrekte me shtetin, nuk përjashtohen as bizneset e mëdha të cilat shmangin detyrimet ndaj shtetit.
Në një dokument të Drejtorisë së Përgjithshme të Tatimeve në datën 30 shtator të këtij viti numërohen 32,164 biznese, të mëdha dhe të vogla, që janë debitorë ndaj të cilëve është vendosur barra siguruese apo hipotekore. Këto biznese janë nën sekuestro duke mos i lejuar të bëjnë asnjë veprim me pasuritë e tyre pa shlyer borxhin.
Në listën e gjatë të bizneseve të cilave u ndalohet kryerja e transaksioneve për transferimin e pasurive të tatimpaguesve debitorë, gjenden edhe kompani të mëdha dhe me emër të vendit.
Disa prej tyre janë:
“Phoenix Petroleum Gas” e cila ka lidhur një marrëveshje me kompaninë shtetërore Albpetrol sh.a. për prodhim të hidrokarbureve dhe gazit në 5 fusha rezervash në jug të Shqipërisë. 5 fushat me gaz natyror kanë në total prej 447 milion Nm3 të mbetur në rezervat e verifikuara dhe rreth 3 miliardë Nm3 gazi prej kategorive të mundshme në zonat produktive. Edhe pse kompania xhiron miliarda lekë nga pasuritë e vendit, kur vjen puna tek detyrimet, ajo i shmanget.
“DELVINA GAS COMPANY” e cila vepron në fushën e hidrokarbureve dhe gazit natyror në Shqipëri. Sipas “open procurement”, kompania në fjalë ka deri në 2019-ën, xhiron vjetore e ka pasur 135 868 923 milionë lekë, ndërkohë nga ana tjetër nuk paguan taksat e shtetit.
“TRANSPETROL” është kompani që ka disa vite që vepron në Shqipëri, me qendër në Berat, kryesisht në tregtimin e karburanteve dhe lubrifikanteve. Problemet me detyrimet ndaj shtetit, kjo kompani i ka që në 2017-ën ku në atë kohë kishte 830 milionë lekë borxhe.
“EUROMAX”, është kompani që vepron në fushën e supermarketeve dhe të hipermarketeve, në shitje dhe importimin me pakice të produkteve ushqimore dhe jo-ushqimore, vepron që në vitin 2004, por që nuk është e rregullt me taksat e shtetit.
“FIN PEK PETROLEUM” e cila importon dhe eksporton me shumicë e pakicë të sistemeve, seteve pajisjeve, mjeteve programeve informatike, elektronike e mekanike. Sipas xhiros vjetore të deklaruar në vitin 2018-të, kompania e ka pasur 12 610 710 lekë, ndërsa detyrimet ndaj shtetit nuk i paguan.
“SUN PETROLEUM” është kompani që vepron në nxjerrjen, shfrytëzimin, përpunimin, importin, eksportin dhe tregtimin e benzinës, naftës dhe gazit. Xhiron vjetore e ka deklaruar deri në vitin 2016 dhe shkonte deri në 3,205,362,769, ndërkohë që është akoma debitorë ndaj shtetit kur bëhet fjalë për taksat.
Ndër brendet e mëdha dhe të njohura, është edhe “Birra Tirana”, e cila vepron që në vitin 1998 në tregun shqiptar, e cila rezulton që nuk është e rregullt me detyrimet ndaj shtetit.
Sipas të dhënave të fundit të Kontrollit të Lartë të Shtetit, i cili është publikuar në shtator të këtij viti, borxhi tatimor vlerësohet mbi 960 milionë euro, ose sa 1/4 e buxhetit të shtetit. /Gijotina.com
Discussion about this post