Kryeministri Edi Rama ka reaguar sërish ndaj protestave që prej 38 ditësh po zhvillohen në Tiranë, ku qytetarët kërkojnë dorëheqjen e tij.
Gjatë një inspektimi në stadiumin ku pritet të mbahet koncerti i reperit amerikan Kanye West, kreu i qeverisë kritikoi ashpër protestuesit.
Rama i cilësoi ata si “sorra dhe korba bulevardi”, ndërsa hodhi poshtë pretendimet se shteti shqiptar ka shpenzuar dhjetëra milionë euro për organizimin e koncertit.
Sipas tij, qeveria ka ndërhyrë vetëm me një fond prej 4 milionë eurosh për të garantuar zhvillimin e aktivitetit, ndërsa organizimi i koncertit është marrë përsipër nga një grup privat me partnerë shqiptarë, gjermanë dhe turq.
“Ky është një event i organizuar nga grupi privat. Shteti shqiptar është detyruar të ndërhyjë vetëm dje për të dhënë jo dhjetëra milionë euro, siç thonë sorrat dhe korbat e bulevardit, por 4 milionë euro që të garantojmë ardhjen e mijëra njerëzve që kanë prerë bileta nga mbi 80 shtete të botës”, deklaroi Rama.
Kryeministri theksoi se organizimi i eventeve të tilla sjell përfitime të rëndësishme ekonomike për vendin, veçanërisht për kryeqytetin, pasi vizitorët kontribuojnë në rritjen e aktivitetit në sektorët e turizmit, hotelerisë dhe shërbimeve.
“Këto nuk janë shpenzime, por investime për një Shqipëri tjetër që nuk ndalet dhe nuk kthehet prapa. Le të hidhen përpjetë ata që nuk duan”, u shpreh Rama.
Deklaratat e tij vijnë në një kohë kur protestat kundër qeverisë vijojnë prej më shumë se një muaji, ndërsa organizimi i koncertit të Kanye West ka shkaktuar debat të gjerë në opinionin publik për koston dhe përfshirjen financiare të shtetit.
Discussion about this post