Po dalin një nga një përfituesit e tenderit të famshëm për rikonstruktimin e qendrave shëndetësore, me vlerë 2.8 miliardë lekë. Për këtë tender ra në rrjetën e SPAK Joana Duro, sekretarja e Ogerta Manastirliut, e cila kishte marr ryshfet për të dhënë tenderin pa garë.
Ky super projekt është ndarë në disa lote dhe sigurisht ka pasur disa fitues, njëri më oligark më madh se sa tjetri. Ndërkohë sot do të shohim se një nga lotet ka shkuar në dorën e biznesmenit mashtrues. Bëhet fjala për lotin 3 me objekt “Rikonstruksion i disa QSH- ve në qarqet Shkodër, Kukës, Lezhë, Dibër”. Bëhet fjalë për të rregulluar suvanë dhe lyer muret e këtyre qendrave të vogla shëndetësore, ku Manastirliu do të shpenzojë 930 milionë lekë.
Këto para përfundojnë në duart e një mashtruesi. Siç shohim në kontratën e publikuar në Buletinin e datës 10 korrik 2023, për këtë tender kanë paraqitur oferta 6 firma. Njëra prej tyre ka marrë pjesë fiktivisht, sepse nuk ka paraqitur asnjë ofertë. Ndërsa tre të tjera kanë ofruar të njëjtin vlerë ofertë të lartë.
Sigurisht ishte mes tyre edhe një tjetër ofertë shumë më e lirë, e firmës “KEVIN CONSTRUKSION”, me vlerë 690 milionë lekë.
Por, stafi i Ogerta Manastirliut, siç doli edhe nga dosja e SPAK-ut, i kishte planifikuar që më herët fituesit
Dhe për këtë lot ishte paracaktuar fituese firma “COMPANY RIVIERA 2008” me ofertën 710 milionë lekë. Ishte një ofertë e lartë, sa 89% e fondit limit, por ky kriter i rëndësishëm është anashkaluar.
Kompania fituese është në pronësi të një oligarku mjaft të njohur, Agim Kola, i cili i ka ndarë aksionet me familjarë të tjerë. Ai është gjithashtu, edhe pronari i firmës ‘ANK”, e themeluar nga vëllai i tij Ndue Kola, ish-deputeti i Partisë Socialiste.
Por, jo vetëm kaq! Kola është pronar edhe i firmës “Rr.s.M dhe Hidro Company”, me të cilën ka kryer mashtrime me TVSH dhe për këtë në vitin 2019 ka rënë në prangat e policisë.
Sigurisht pas disa ditësh, duke qenë sa ka miq pranë Rilindjes, biznesmeni arriti të dalë nga burgu dhe vazhdon aferat me ministret e Ramës.
Ndërkohë, ditën e sotme SPAK ka zbardhur skemën e korrupsionit në ministrinë e Shëndetësisë, ku mes tre personave të arrestuar është edhe sekretarja e këtij institucioni Joana Duro.
Prokuroria e Posaçme kundër Korrupsionit dhe Krimit të Organizuar i është drejtuar Gjykatës së Posaçme të Shkallës së Parë për Korrupsionin dhe Krimin e Organizuar me kërkesë për dërgimin e çështjes për gjykim në ngarkim të të pandehurve Joana Duro, Laura Shteto dhe Vladimir Topi.
“Nga hetimi me metoda speciale është dokumentuar fakti i dërgimit të shumës së parave prej 330 000 (treqind e tridhjetë mijë) lekë nga ana e të pandehurës Laura Shteto tek e pandehura Joana Duro, kjo e fundit me detyrë Sekretare e Përgjithshme në Ministrinë e Shëndetësisë dhe Mbrojtjes Sociale. Kjo shumë parash i është dorëzuar të pandehurës Joana Duro në zyrën e saj në Ministrinë e Shëndetësisë dhe Mbrojtjes Sociale, ku dhe është bërë kapja në flagrancë e saj dhe sekuestrimi i kësaj shume monetare”, thuhet ne njoftimin e SPAK.
Discussion about this post