Komisioneri Publik është ankuar sot në KPA për vendimin për gjyqtaren e Vlorës, Atalanta Zeqiraj, ku I kërkon të merret një vendim dhe mos të sorollatet më çështja. Pak javë më par KPK vendosi të konfirmojë në detyrë Zeqirajn, por ky vendim u kundërshtua nga ONM, që duke arsyetuar se duhen kryer më shumë hetime rreth gjyqtares, pasi janë bërë tolerime, propozoi shkarkimin. Por, nga na tjetër ky vendim është kundërshtuar nga juristët e Vlorës, të cilët përmes një peticion i kanë dalë në mbrojtje gjyqtares.
Nga këto përplasje ka reaguar sot edhe Komisioneri Publik, i cili në mënyrë të prerë kërkon shkarkimin e Zeqiraj, ndërsa iu bënë thirrje KPA të marrë një vendim.
“Komisioneri Publik, brenda afatit ligjor, ushtroi ankim në Kolegjin e Posaçëm të Apelimit, pranë Gjykatës Kushtetuese, kundër vendimit nr. 410, datë 30.6.2021, të Komisionit të Pavarur të Kualifikimit, për subjektin e rivlerësimit, znj. Atalanta Zeqiraj, me funksion gjyqtare në Gjykatën e Rrethit Gjyqësor Vlorë.
Komisioneri Publik konstaton se, nga shqyrtimi i vendimit nr. 410/2021, të Komisionit të Pavarur të Kualifikimit dhe akteve shoqëruese të tij, bazuar në Rekomandimin e Operacionit Ndërkombëtar të Monitorimit (ONM), paraqiten rrethana të tilla ligjore, që e bëjnë të cenueshëm vendimin në tërësinë e tij”, thuhet në njoftim.
Kujtojmë se ONM dhe organizata të tjera ndërkombëtare, që asistojnë në reformën në drejtësi për Shqipërinë, kanë shfaqur kritikat e tyre mbi shumë vendime të KPK për konfirmimin në detyrë apo shkarkimin e disa gjyqtarëve dhe prokurorëve.
