Kryeministri i Kosovës Albin Kurti, në një konferencë për mediat prezantoi ministrin e ri të Shëndetësisë në vend pasi Arben Vitia la postin për të garuar si kryetar i Prishtinës.
Rifat Latifi, minisitri më i ri i Shëndetësisë në Kosovë, prej vitesh ka punuar si mjek në SHBA, por së fundmi ka ardhur në Kosovë për të shërbyer në postin e ri. Lidhur me ish-ministrin që humbi zgjedhjet, Kurti u shpreh se nuk ka ndonjë nxitim për ta thënë tani se cili do të jetë angazhimi i tij i radhës.
Gjatë kësaj dalje për mediat, Kurti nuk iu ka shpëtuar pyetjeve të gazetarëve, mbi nismën Ballkan i Hapur, ku iu rikujtua premtimi që është bërë nga vendet pjesë të nismës, mbi heqjen e kontrollit kufitar nga 1 janari i 2023.
Por, dukshëm as ky premtim nuk e bind kryeministrin Albin Kurti, i cili u përgjigj se qëndrimi i Prishtinës zyrtare nuk do të ndryshojë për sa kohë Serbia mbetet e mbyllur ndaj Kosovës.
“Për Open Balkan e keni të qartë që qëndrimi mbetet i qartë dhe i pandryshuar. Nuk ka Ballkan të Hapur sa kohë Serbia është e mbyllur për Kosovën…Mund të jetë interesi i saj por emërtimi është i gabueshëm i pavërtetë. Deri në atë ditë mund të ndodhin shumë zhvillime politike..”
Discussion about this post