Një operacion i koduar “Vjeshta” është finalizuar në Sarandë pas një hetimi dy-mujor, duke çuar në arrestimin e 20 personave të dyshuar për shpërndarje të lëndëve narkotike dhe armëmbajtje pa leje.
Operacioni është zhvilluar nga Policia e Sarandës në bashkëpunim me Prokurorinë, ndërsa Gjykata e Sarandës kishte caktuar për të dyshuarit masën e sigurisë “arrest në burg”.
Në pranga kanë rënë 20 persona, të moshave nga 20 deri në 54 vjeç, banues kryesisht në Sarandë dhe Ksamil.
Ndërkohë, një 36-vjeçar nga Lushnja, me inicialet E. N., është proceduar në gjendje të lirë. Sipas policisë, ai ka kundërshtuar shërbimet gjatë kontrollit në një dhomë hoteli, ku u kap një prej të arrestuarve dhe u gjet një armë zjarri.
Çfarë u sekuestrua
Gjatë kontrolleve të zhvilluara në kuadër të operacionit, policia sekuestroi:
– Sasi kokaine dhe kanabisi;
– 2 pistoleta;
– 4 automjete;
– 19 aparate celulare;
– Një shumë parash në lekë dhe euro.
Hetimi nisi dy muaj më parë
Sipas policisë, hetimi është nisur rreth dy muaj më parë nga Komisariati i Policisë Sarandë, në bashkëpunim me Prokurorinë.
Më 31 korrik 2026, në kuadër të të njëjtit procedim, u arrestuan në flagrancë tre persona, A. N., A. C. dhe K. J.
Gjatë atij operacioni u sekuestruan rreth 5 kilogramë lëndë narkotike e dyshuar kanabis. Sipas hetimeve, droga dyshohej se ishte destinuar për shpërndarje në Sarandë dhe Ksamil.
Nga veprimet hetimore të kryera deri tani dyshohet se grupi ushtronte aktivitetin e shitjes së lëndëve narkotike në zona të ndryshme të Sarandës, përfshirë plazhet, lokalet e natës dhe ambiente pranë shkollave.
Materialet procedurale i janë referuar Prokurorisë për vijimin e hetimeve dhe procedurave të mëtejshme ligjore.
Discussion about this post