Opozita kërkon Ramën në Kuvend, Spiropali: Garda të ikë, s’kemi frikë

Ministrja për Marrëdhëniet me Parlamentin, Elisa Spiropali i bëri thirrje Gardës së Republikës që të largohej nga foltorja se nuk kishin frikë nga deputetët e opozitës.

“I bëj thirrje punonjësve të gardës, që të largohen nga foltorja se ne nuk kemi frikë nga ata që kanë frikë nga vetja e tyre. Ju lutem largohuni, le të rrinë në foltore dhe të bëjnë zhurmën.

Ne patëm durimin që të dëgjonim më shumë se 20 deputetë për procedurë, që vetëm për procedurë nuk qe. Ju dëgjuam me respektin më të madh, pa ndërhyrë, jo se nuk kemi çfarë themi, por se respektojmë deputetët dhe këtë parlament.

Sa i takon përballjes me të vërtetën nuk kemi hezituar as në këtë Kuvend, dhe as në Komisionet Hetimore, ku vetë kryeministri është përgjigjur me orë të tëra.

Një precedent i vendosur nga kjo qeveri, e keni nisur që në kohën e Fatos Nanos me akuza kriminale, dhe i vazhdoni edhe sot. Sa herë që votoheni populli shqiptar jua kthen përgjigjen me votë, për respekt të publikut në Konferencën e Kryetarëve ne diskutuam për interpelancën dhe mocionin me debat që kërkuat ju, urgjencën nuk mund ta përcaktoni ju.

Albana nuk e kuptoj pse vazhdon që ti biesh foltores.

Gara për urgjencën është mes grupimeve tuaja se kush do të flasë i pari, se ne për urgjencë votuam protestuesit autorizimit në seancën e kaluar, se ndryshe nga ju ne nuk bëjmë politikë të ditës me çështje të drejtësisë.”, tha Spiropali.

Gjithashtu, ditën e sotme studentët e mjekësisë po protestojnë jashtë Parlamentit teksa pritet të votohet projektligji që i detyron që pas mbarimit të universitetit, të punojnë 5 vite në vend.

Protestës së studentëve iu bashkuan edhe disa prej deputetëve të opozitës, të cilët pasi dëgjuan shqetësimet e studentëve u futën sërish në Kuvend, duke u mbledhur rreth Foltores.

Studentët kanë kërkuar të bëhen pjesë e seancës. Studentët kanë thënë se i kanë bërë kërkesë kryetares së parlamentit Lindita Nikolla por nuk kanë marr përgjigje.

Deputetët e opozitës, të cilët bllokuan foltoren, të përfaqësuar nga Zheni Gjergji, e cila bëri thirrje që fjala e studenteve të dëgjohet.