Kreu i Bashkisë Përrenjas po shpenzon lekë më thasë nga fondet e mbetura për vitin 2022. Përrenjasi është një qytet i vogël, por kryebashkiaku Nuri Belba po derdh 380 milionë lekë vetëm për një rrugicë lagjeje. Më datë 22 dhjetor 2022, Belba ka firmosur kontratën për tenderin me objekt “Rikonstruksion i rrugës Rashtan” me fond limit 38 236 028,00 lekë (të reja).
Edhe të ndërtohej nga e para, nuk do të kushtonte kaq shumë kjo rrugë, ndërsa Belba e bën lekun letër për rikonstruksionin e saj. Saka, në dokumentet e këtij tenderi të bie në sy se kanë paraqitur oferta 10 kompani gjigante. Të cilat gjitha kanë qenë shpesh herë në qendër të vëmendjes për korrupsionin me tenderët. Por, këtë prokurim Belba e kishte taksur për firmën “COMPANY RIVIERA 2008”.
Kjo e fundit u shpall fituese pa konkurrencë, pasi të nënta kompanitë e tjera u përjashtuan menjëherë nga gara me justifikimin se nuk kanë deklaruar një punonjës elektricist, shofer dhe murator. Kështu në garë mbeti vetëm kompania “COMPANY RIVIERA 2008” e Agim Kolës dhe iu firmos kontrata me shpejtësi. Ky tender klasifikohet në prokurimet me risk të lartë dhe mban “flamurin e kuq”. Madje në këtë rast, kompania fituese ka paraqitur dhe ofertën më të shtrenjtë.
Ndërkohë, përmendim se kompania ka si administrator Agim Kolën. Por, pronari i vërtet i saj është vëllai Ndue Kolës, ish-deputet i PS-së.
Në fakt, kështu është proceduar për tri kompanitë që administron Agim Kola. Konkretisht, firmat “RSM Company SH.P.K”, “A. N. K” dhe “COMPANY RIVIERA 2008” janë themeluar nga Ndue Kola, tani të gjitha kanë kaluar në emrin e Agim Kolës.
Aferat e Kolës
Agim Kola dhe vëllai i tij Ndue Kola kanë marrë pjesë edhe në mega aferën e rrugës Milot-Balldren. Për këtë të fundit, KLSH ka konstatuar miliona euro humbje për shkak të tenderëve të firmosur në kundërshtim me ligjin.
Koncensioni me vlerë 255 milionë euro, nga të cilat 213 milionë euro vlera e projektit dhe pjesa tjetër TVSH, ishte goditja më e madhe financiare që ka realizuar kompania “ANK”. Me të tria këto kompani, vëllezërit Kola përfitojnë miliarda lekë transaksione nga Thesari i Shtetit, ku rezulton që të paktën njëra prej tyre siguroi 40 milionë euro tenderë në 3 vite.
Kujtojmë se mё 12 shtator 2019 efektivët e rendit ndaluan biznesmenin Agim Kola, i cili akuzohej se nëpërmjet blerjeve dhe shitjeve me fatura fiktive ka përfituar në mënyrë të paligjshme një sasi të konsiderueshme parash.
Në prangat e policisë ra administratori i kompanisë Rr.s.M dhe Hidro Company, Agim Kola, i cili akuzohet se është i përfshirë në skemën e evazionit 30 mln euro me faturat fiktive.
Lexo edhe:Luan Kapri dhe “Gëzimi i Kashtës” rekord abuzimesh, rrëmbejnë 1 mld lekë në Përrenjas për plehra
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post