Kryebashkiaku Erion Veliaj po i bën lekët rrush e kumbulla për “sistemet inovative” dhe asfalt. Bashkia Tiranë këtë fillim viti ka regjistruar disa tenderë dhe të gjitha kanë marrë ‘Red Flag”. Përveç kësaj janë projekte që nuk sjellin efekt te qytetarët, por mbushin xhepat e klientëve të pushtetit.
Përmendin këtu prokurimin me objekt “Rritja e aksesit në informacion dhe shërbime nëpërmjet teknologjisë së inovacionit”. Për këtë janë lënë në dispozicion 30 milionë lekë. Ca lekë të xhiruara për qejf!
Teknologjia e inovacionit që po zbaton ky institucion, jo vetëm që nuk ka lidhje me shërbimet ndaj qytetarëve, por iu vë në rrezik të dhënat personale. Këto lloj sistemesh janë të pasigurta dhe sikur kemi parë deri më tani, platformat e qeverisë po goditen një nga një nga hakerat.
Përveç kësaj, ky tender është dhënë pa garë dhe ka shkelur rregullat bazë të ligjit për prokurimet. Sipas të dhënave, tri kompani kanë paraqitur ofertat e tyre. Dy prej tyre, Veliaj i ka skualifikuar automatikisht dhe në fazën e konkurrimit ka lënë vetëm firmën ATD – ALBANIAN TECHNOLOGY DISTRIBUTION, të Nusren Metulit.
Vetëm para disa ditësh, Veliaj mbylli afatin për garën dhe e shpalli fitues Nusrenin në mungesë gare. Vlen të përmendim se oferta e kësaj firme është shumë më e shtrenjtë se dy ofertat e tjera.
Lekët tek miku i Gonxhes
Epo Veliaj nuk mund t’ia prishte Nusren Metulit, i cili është një nga miqtë e mirë të Blendi Gonxhes. Pak javë më parë gijotina.com ka denoncuar se si Metuli shiste makinat e Gonxhes. Kompania A-T-D – ALBANIAN TECHNOLOGY DISTRIBUTION SH.P.K., është një kompani e cila merret me sistemet GPS të gjurmimit të makinave. Në bazë të disa dokumenteve të mjeteve që publikon kjo kompani si dhe në bazë të të dhënave të shasisë, rezulton se janë në përdorim nga ALBARENT SHPK që është në fakt edhe firma në pronësi të Blendi Gonxhes.
277 milionë lekë për arnim rruge
Po në këtë valë shpërdorimesh, Veliaj ka hapur garën për një rrugë të cilën çdo vit e rindërton, por vetëm disa muaj zgjat asfalti. Kjo për shkak se i bëhen arnime copa-copa. Bëhet fjalë për prokurimin me objekt “Ndërtimi i infrastrukturës lidhëse me autostradën Tiranë-Elbasan”. Këtu Veliaj do të shpenzojë jo pak por 277 milionë lekë (të reja).
Paratë për këtë tender janë siguruar një pjesë nga buxheti 2022, dhe një pjesë nga buxheti i këtij viti. Pra, siç duket Veliaj i ka “kursyer” paratë nga viti i kaluar për të tillë tenderë abuzivë. Nuk kuptohet, si teprojnë paratë këtij kryebashkiaku, që vitin e kaluar, sipas Ministrisë së Financave, kishte afro 8.3 miliardë lekë detyrime të papaguara?! Me gjithë këto abuzime që kryen, Lali Eri me siguri ka marrë imunitet të pashpallur nga SPAK-u dhe KLSH-ja!
Lexo edhe: PD kallëzon në SPAK Veliajn: Kreu shkelje të rënda ligjore
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post