Gjykata ka dhënë masën e sigurisë “arrest me burg” për avokatin, Alban Bengasi.
Avokati Alban Bengasi i cili akuzohet se pagoi 120 mijë euro që të vrisnin dhe të rrihnin gruan e tij, ka dalë sot para gjykatës për t’u njohur me masën e sigurisë. Avokati ka deklaruar para trupës gjykuese se nuk ka asnjë lidhje me akuzat.
Ai pretendoi se me bashkëshorten ka marrëdhënie normale ndonëse është divorcuar. Ai ka kërkuar që të hetohet pa masë sigurie.
“U kanë futur në një rrugë pa krye, u kanë orientuar gabim. Nuk kam lidhje me akuzat. Me bashkëshorten kam marrëdhënie normale pavarësisht se jemi divorcuar. Kërkoj të hetohem pa masë”, ka thënë ai para gjykatës.
Blerta Bengasi, ish-bashkëshortja e avokatit Alban Bengasi, ra pre e një sulmi fizik më 31 Janar të vitit 2020 teksa qëndronte në automjetin e saj. Ajo humbi vetëdijen për të paktën 9 ditë, megjithatë arriti t’i tregojë hetuesve identitetin e autorit duke thënë se ai ishte një person i moshës 28-33 vjeç, rreth 178 cm i gjatë, ezmer, flokë të errët të shkurtër. Më shumë se 3 vite pas kësaj ngjarje, i penduari i drejtësisë Nuredin Dumani u tregoi hetuesve se porositësi i këtij sulmi ishte bashkëshorti i saj, Alban Bengasi me të cilin në atë kohë ajo ishte në proces divorci, i cili kishte paguar 120 mijë euro.
Sipas Dumanit, Bengasi e donte të vdekur bashkëshorten e tij pasi dyshonte se ajo e kishte tradhtuar me shokun e tij të ngushtë. Nuredin Dumani i ka thënë grupit hetimor se personi që e ka kontaktuar fillimisht me avokatin ka qenë Festim Qoli, një nga 9 personat e arrestuar një ditë më parë në kuadër të operacionit “Plumbi i Artë”.
Bengasi e ka cilësuar si mashtrues bashkëpuntorin e drejtësisë, duke u shprehur se në asnjë moment nuk i është shmangur hetimit.
Discussion about this post