Partizani vijon përgatitjet në tokën sllovene, në kuadër të eliminatoreve të Conference League, ku do të përballet me gjeorgjianët e Sarbotalos në turin e parë, ndërsa drejtuesit po punojnë gjithashtu për të përforcuar skuadrën në merkato.
Emri i fundit që ka dalë në skenë, është vërtetë i bujshëm, pasi bëhet fjalë për brazilianin Luan Capanni, i cili është në pronësi të Milanit.
Sulmuesi 22-vjeçar ka kaluar sezonin e fundit në Serinë C, mes Grossetos dhe Viterbeses, teksa mediat italiane konfirmojnë se është shumë pranë huazimit në kryeqytetin shqiptar, pikërisht te Partizani.
Luan Capanni është rritur te të rinjte e Flamengos, teksa në 2018-ën e solli në Itali Igli Tare, që e mbajti vetëm një sezon në ekipin e Lazios, pasi me 13 gola dhe dy asiste, tërhoqi vëmendjen e Milanit.
Edhe te të rinjtë e kuqezinjve Capanni bëri mjaft mirë, duke shënuar 9 gola, por më pas nuk i ka ecur si duhet me huazimet dhe Partizani mund të jetë trampolina e duhur drejt Europës.
Luan Capanni është 1.9 metra i gjatë dhe luan si qendërsulmues, teksa bashkë me Skukën, do të formonin një dyshe vërtetë të rrezikshme.
Discussion about this post