Skuadra e Partizanit nuk ka shkuar më shumë se barazimi 1-1 ndaj Egnatias. Të kuqtë ë kryeqytetit barazuan në shtëpi ndaj skuadrës rrogozhinase teksa në shtatë javë kampionat nuk e kanë shijuar ende fitoren e parë sezonale. Një tjetër dështim tek Partizani që komplikon edhe më shumë ecurinë e këtij sezoni. Të parët që kaluan në avantazh ishin miqtë me Xhekson i cili shënoi duke përfituar nga gafa e portierit Alban Hoxha.
Megjithatë skuadra e trajnerit Ilir Daja barazoi me Carën në fundin e pjesës së parë të lojës. Në fraksionin e dytë të dyja skuadrat kërkuan golin e avantazhit teksa Egnatia ishte e pafat duke gjetur shtyllën e kuadradit të Alban Hoxhës. Në kampin e Partizanit nuk munguan tentativat për gol por kryeqytetasit dështuan të finalizonin. Në fund skuadrat ndanë pikët, rezultat që i nevojitet më shumë skuadrës rrogozhinase që ngjitet në kuotën e 9 pikëve në kampionat teksa Partizani mbetet në një krizë të thellë rezultatesh.
