Flakë për flakë! Pas konferencës për shtyp të ish-kryeministrit Sali Berisha, vjen reagimi i parë nga Ambasada Amerikane në Shqipëri.Zyra e shtypit e ambasadës amerikane në një reagim për RTSH shkruan se qëndrimi i SHBA-ve për vendimin “non grata” do të mbetet i pandryshuar. Ndërsa gjithashtu shtojnë se për luftën ndaj korrupsionit Shtettet e Bashkuara të Amerikës do të përdorin çdo instrument ligjor që kanë në dispozicion.
“Midis urdhërit ekzekutiv të Presidentit Biden, shpalljes nga sekretari i shtetit Blinken, deklaratave të ambasadores Kim përpara shtypit medias javën e kaluar dhe editorialit të saj këtë javë, qëndrimi i SHBA është i qartë dhe i pandryshuar: Lufta kundër korrupsionit përbën një interes thelbesor të sigurisë kombëtare të Shteteve të Bashkuara dhe ne do të përdorim të gjitha instrumentet që kemi në dispozicion për tu përballur me korrupsionin dhe pandëshkueshmërinë,”-thuhet në reagimin e Ambasadës.
Në konferencën e sotme për mediat, ish-kryeministri Sali Berisha bëri me dije se ka depozituar padinë ndaj sekretarit të Departamentit Amerikan të Shtetit, Antony Blinken. Lidhur me ultimatumin e Kim, Sali Berisha theksoi se në shtator do të jetë në Kuvend si deputet i Partisë Demokratike, duke kërkuar që ambasadorja të kërkojë falje për referencën e saj me “barin”, ndërsa edhe njëherë e sfidoi që të publikonte dokumenta që provojnë se ka ushtruar korrupsion gjatë detyrës si kryeministër.
