Apeli i GJKKO ka lënë në fuqi vendimin për sekuestron e pasurive të Arben Ahmetajt.
Ky i fundit nga arratia kishte kërkuar përmes mbrojtësve të tij ligjorë heqjen e sekuestros ndaj 4 banesave dhe dy llogarive bankare, të cilat ishin sekuestruar me urdhër të SPAK, ndërsa GJKKO kishte miratuar kërkesën.
Sekuestro preventive është vendosur mbi 6 pasuri nga të cilat 4 apartamente në pronësi të personit nën hetim Arben Ahmetaj si dhe 2 llogari bankare të po këtij shtetasi, në shumën 124 300 Euro.
Ndaj Ahmetaj ka një urdhër arresti ndërkombëtarë me masë shtrenguese “arrest ne burg” për veprat penale, shpërdorim detyre, pastrim parash dhe fshehje pasurie.
Ahmetaj u largua nga Shqipëria ditën që SPAK depozitoi në Kuvend kërkesën për marrjen e autorizimit për arrestimin e ish-zv.Kryeministrit dhe deputetit socialist. Pothuajse brenda 1 javë pas debatesh të shumta lidhur me procedurat, Kuvendi miratoi kërkesën e SPAK, ndërsa zv.Kryeministri ndodhej në arrati. Fillimisht u tha se deputeti socialist kishte udhëtuar drejt Greqisë, pastaj u deklarua si vendndodhje e tij Britania e Madhe, por zyrtarisht ende institucionet shqiptare nuk kanë një përgjigje se ku ndodhet Ahmetaj.
Ahmetaj është një nga zyrtarët e hetuar lidhur me aferën e inceneratorëve, ndërsa SPAK ka ngritur dyshime serioze mbi lidhjet e tij me Klodian Zoton dhe Mirel Mërtirin.
Discussion about this post